जेठ १८, काठमाडौं । पूर्वअर्थमन्त्री एवं नेकपा (एमाले) का उपाध्यक्ष सुरेन्द्र पाण्डेले डलरको सञ्चिती घट्ने क्रम जारी रहे नेपालको अवस्था श्रीलंकाको जस्तो हुनसक्ने बताएका छन् ।
बुधवार आर्थिक वर्ष २०७९/ ८० को बजेटमाथिको छलफलमा बोल्दै उनले यो अवस्थाले श्रीलंकाको जस्तो अर्थतन्त्र धरासयी हुने संकेत देखिएको बताए । उनले हरेक महीना १२ देखि १५ करोड डलर घट्दै गएको भन्दै उनले यस्तै अवस्था रहे बजेटको लक्ष्य पूरा हुन नसक्ने बताए ।
उनले भने, ‘यस वर्षको हाम्रो ९ करोड ६१ अर्ब डलर रिजर्भ छ । २ अर्ब ७० करोड डलरको साउनदेखि अहिलेसम्म डिपोजिट घटेको छ, हरेक महीना १२ देखि १५ करोड डलर घट्दै छ । डलरको डिपोजिट घटिरह्यो भने हाम्रो आयात घट्ने छ । हामीले फरेन करेन्सी दिन सक्दैनौं ।’
उनले सरकारले बृद्धभत्ता बढाएर मासिक ५ हजार पुर्याउनुपर्नेमा वृद्धभत्ता प्राप्त गर्ने उमेर घटाएकोमा विरोध पनि गरेका छन् । बजेटले मुलुकको वर्तमान आर्थिको संकट समाधान गर्नतिर ध्यान नदिएको उनको भनाइ छ ।
अहिले पनि किसानले मल नपाउने अवस्था रहेकाले त्यो समस्याको समाधान नगरी कृषि उत्पादन बढाउन नसकिने उनको भनाइ छ । वर्षे बाली लगाउने समयमा भारतबाट मल कहिले आउँछ टुङ्गो नभएको अवस्थामा मलमा बजेट आधा छुट्टाएर उत्पादन बढाउन नसकिने पनि उनले बताए ।
