काठमाडौं । पोखरा अन्तरराष्ट्रिय विमानस्थल कार्यालयले वार्षिक ३० करोड रुपैयाँ आम्दानी गर्ने लक्ष्य राखेको छ । सोही विमानस्थल निर्माण गर्दा लिएको ऋणको साँवाब्याज भुक्तानी गर्न वार्षिक २ अर्ब ४ करोड रुपैयाँको किस्ता तिर्नुपर्ने देखिएको छ ।
गत पुस १७ गतेदेखि सञ्चालनमा आएको यो विमानस्थलको किस्ता तिर्ने अवधि चैतदेखि शुरू हुँदै छ । नेपाल सरकारले चिनियाँ एक्जिम बैंकबाट लिएको ऋणको पहिलो किस्ता १ अर्ब २ करोड रुपैयाँ चैतमा बुझाउने कार्यतालिका छ । सरकारले उक्त बैंकमार्फत नेपाल नागरिक उड्डयन प्राधिकरणलाई दिएको ऋणको ग्रेस अवधि ७ वर्ष सकिएर किस्ता तिर्ने समय शुरू हुन लागेको हो ।
पोखरा अन्तरराष्ट्रिय विमानस्थल सञ्चालन भएर यसले गर्ने आम्दानीले उक्त किस्ता तिर्न सम्भव नहुने प्राधिकरणले बताइसकेको छ । यद्यपि यो वर्षको आम्दानी लक्ष्य कार्यालयले बढाएको छ । अन्तरराष्ट्रिय विमानस्थलका रूपमा सञ्चालनमा आएको डेढ महीना हुन लाग्दा प्राधिकरणले सरकारलाई पहिलो किस्ताबापत उक्त रकम तिर्नुपर्ने हुन्छ ।
तर, किस्ता तिर्ने दबाब भने नभएको प्राधिकरणका अधिकारी बताउँछन् । प्राधिकरणको ऋण भुक्तानी तालिकाअनुसार चैत १ गते किस्ता तिर्नुपर्छ । प्राधिकरणका सूचना अधिकारी ज्ञानेन्द्र भुलले अहिले किस्ता तिर्न समस्या नभएको बताए । ‘प्राधिकरणले तत्काल चुक्ता गर्न नसके पनि अर्थ मन्त्रालयमार्फत किस्ता भुक्तानी हुनेछ,’ उनले भने । सरकारले किस्ता भुक्तानी नगरे पनि प्राधिकरणको सञ्चित नाफा राम्रो छ । प्राधिकरणको तथ्यांकअनुसार २०७८ को तुलनामा केही सञ्चित नाफा घटे पनि २०७९ असारसम्म सञ्चित नाफा १ खर्ब ४६ अर्ब ५३ करोड रुपैयाँ छ । यसबाट पनि प्राधिकरणले किस्ता तिर्न सक्ने अवस्था छ । २०७८ असारसम्म प्राधिकरणको सञ्चित नाफा १ खर्ब ४७ अर्ब १२ करोड रुपैयाँ थियो ।
अर्धवार्षिक रूपमा किस्ता तिर्नुपर्ने ऋण तालिकाअनुसार ६ महीनामा १ अर्ब २ करोड रुपैयाँ तिर्नुपर्छ । वार्षिक रूपमा २ अर्ब ४ करोड रुपैयाँ किस्ता तिर्नुपर्छ । ऋण लिएको २० वर्ष (२०९२ साल असोज १ गते) भित्र किस्ता तिरिसक्नुपर्ने हुन्छ । पोखरा अन्तरराष्ट्रिय विमानस्थल बनाउन सरकारले २०७२ सालमा उक्त बैंकसँग सम्झौता गरेको थियो । पोखरा अन्तरराष्ट्रिय विमानस्थल सञ्चालनमा आएपछि पोखरा विमानस्थल कार्यालयले चालू आर्थिक वर्ष (आव) को नाफा पनि दोब्बर हुने प्रक्षेपण गरेको छ ।
आव २०७८/७९ मा १३ करोड रुपैयाँ आम्दानी भएको यो विमानस्थलबाट प्राधिकरणले चालू आव २०७९/८० मा भने दोब्बरभन्दा बढी (३० करोड रुपैयाँसम्म) आम्दानी गर्ने लक्ष्य राखेको विमानस्थल कार्यालयका प्रवक्ता जशोधा सुवेदीले जानकारी दिइन् । पोखरामा अहिले आन्तरिक उडान मात्रै सञ्चालन भइरहेको छ ।
