काठमाडौं । विश्व बजारमा विद्युतीय सवारी साधनको विक्री गएको वर्ष लोभलाग्दो गरी बढेको छ । सन् २०२२ मा विश्वभर ७२ लाख ६० हजार थान विद्युतीय सवारी साधन विक्री भएको छ । विक्रीको यो आकार सन् २०२२ को तुलनामा ६६ दशमलव ६ प्रतिशत धेरै भएको शुक्रवार टोकियोस्थित मार्कलाइन्स कम्पनीले सार्वजनिक गरेको डेटाले देखाएको छ ।
विश्वभर शून्य उत्सर्जन गर्ने विद्युतीय सवारीको प्रयोगलाई बढावा दिन कठोर खालको उत्सर्जन नियमनहरू अपनाउने क्रम जारी रहँदा विद्युतीय सवारी साधनको विक्री अकासिएको छ । गएको वर्ष विश्वभर कुल ७ करोड ६२ लाख १० हजार सवारी साधन विकेका छन् । विक्री भएका कुल सवारी साधनमा विद्युतीय सवारी साधनको अनुपात साढे ९ प्रतिशत छ ।
सन् २०२१ मा कुल विक्री भएका सवारी साधनमा ईभी (EV) को अनुपात साढे ५ प्रतिशत थियो । यूरोपेली तथा चिनियाँ अटो निर्माताहरूले ईभीको विक्री तीव्र पारेका छन् । ईभीबाहेक विश्वभर सवारी साधनको विक्री घटेको छ । सो अवधिमा ६ करोड ८९ लाख ५० हजार थान परम्परागत इन्धनबाट चल्ने सवारी साधन विकेका छन् । विक्रीको यो आकार एक वर्षअघिको भन्दा ७ दशमलव ४ प्रतिशत कम हो ।
बजारको आधारमा ८० प्रतिशत विक्री चीन (China) मा बढेको छ । सो अवधिमा चिनियाँ बजारमा ४५ लाख ३० हजार थान ईभी विक्री भएका छन् । जर्मनी र बेलायत समेतका पश्चिम यूरोपमा पनि विक्री करीब ३० प्रतिशतले बढेर १५ लाख ३० हजार थानमा उक्लिएको छ । गएको वर्ष अमेरिकामा ८ लाख थान ईभी विक्री भएका छन् । जापानमा भने करीब ५० हजार थान विकेका थिए ।
सन् २०२२ मा अमेरिकी विद्युतीय सवारी साधन निर्माता कम्पनी टेस्ला इंकले १२ लाख ७० हजार थान सवारी साधन बेचेको छ । सन् २०२१ मा यो संख्या ८ लाख ८० हजार थान थियो । चिनियाँ विद्युतीय सवारी साधन निर्माता कम्पनी बीवाईडीले पनि गएको वर्ष करीब ८ लाख ७० हजार थान ईभी बेचेको छ । यो अघिल्लो वर्षको तुलनामा दोब्बरभन्दा निकै धेरै हो । एजेन्सी
