अहिले अर्थतन्त्रमा देखिएको समस्या यसअघि लागू गरिएका नीतिको उपज : अर्थमन्त्री

चैत १५, काठमाडौँ । अर्थमन्त्री जनार्दन शर्माले अहिले अर्थतन्त्रमा देखिएका समस्या यसअघि लागू गरिएका नीतिको उपज रहेको बताएका छन् । उनले कमजोर सरकारी संरचना र अनुसन्धान नगरिकन लादिएका नीतिका कारण सरकारले अपेक्षित आर्थिक वृद्धि र विकास निर्माणका गतिविधि संचालन गर्न नसकेको दाबी पनि गरेका छन् ।  नेपाल आर्थिक संघ र बैंक तथा वित्तीय संस्था परिसंघले मंगलवार आगामी बजेटबारे सुझाव दिनका लागि आयोजना गरेको कार्यक्रममा उनले विगतका वर्षहरुमा अबलम्बन गरिएका खराब नीतिका कारण अहिले अर्थतन्त्र चुनौतीपूर्ण अवस्थामा पुगेको बताए ।   उनले हिजोका नीतिले अहिलेको अवस्था सृजना भएको हो भन्दै आफू सबै गुनासो र चुनौती स्वीकार्न आफू तयार रहेको बताए । नेपालमा स्रोत साधन भएपनि त्यसको उचित प्रयोग नहुँदा गरिबी र अभाब बढेको बताए । स्रोतको व्यवस्थापन र परिचालन गरेर समृद्धि ल्याउने उनले प्रतिबद्धता ब्याक्त गरे ।  मन्त्री शर्माले अनुसन्धान बिना कुनै देशले प्रगति नगरेको भन्दै यसलाई संरचनागत सुधार गर्न आवश्यक रहेको बताए । उनले आगामी बजेट आयातमुखीभन्दा पनि उत्पादनमुखी बनाउन आवश्यक रहेको बताए । उनले चालू आर्थिक वर्षका लागि सरकारले राखेको ७ प्रतिशतको आर्थिक वृद्धिदर पूरा नहुने अवस्था आएको पनि बताए । संस्थागत सुधारका लागि पनि आफूले पहल गरेको बताउँदै उनले पुराना नीति पनि हाम्रा कमजोरी नै हुन्, सच्याउनुपर्ने अवस्था छ भनेका छन् ।