वीरगञ्ज । पूर्व–पश्चिम रेलमार्गअन्तर्गत बाराको निजगढमा एलाइनमेन्ट फेरिँदै आएको छ । रेल विभागले पुनः एलाइनमेन्ट परिवर्तन गरिएको जानकारी दिएको हो ।
रेल विभागका अधिकारी र निजगढ नगरपालिकासहित सरोकारवालाहरूसँगको छलफलमा विभागीय अधिकारीहरूले रेलमार्गअन्तर्गत निजगढ खण्डमा दोस्रोपटक एलाइनमेन्ट फेरबदल भएको बताएका छन् । पूर्व–पश्चिम रेलमार्ग र भारतले बनाइदिने वीरगञ्ज–काठमाडौं रेलमार्गको स्टेशन एकै स्थानमा बनाउन एलाइनमेन्ट परिवर्तन गरिएको विभागका इन्जिनियर सुमोद पोखरेलले जानकारी दिए । नेपाल–भारत अन्तरदेशीय रेलमार्गमा भारतको आर्थिक तथा प्राविधिक सहयोग रहेको छ ।
यसअघि निजगढको बकैया खोलाको पूर्वी किनारबाट एलाइनमेन्ट तय भएको थियो । विभागका अनुसार अब रेलमार्गको एलाइनमेन्ट बकैयाखोला पारि निजगढ–१० वन क्षेत्र हुँदै निस्किनेछ ।
पूर्वी नाका काँकडभिट्टादेखि पश्चिम कञ्चनपुरको गड्डाचौकीसम्म ९२५ किलोमीटर रेलमार्गको काम भने नेपालले आफ्नै खर्चमा अघि बढाएको छ । अहिले बर्दिबासदेखि निजगढसम्म ट्र्याक खोल्ने काम भइरहेको छ । निजगढ क्षेत्रमा एलाइनमेन्टको विषयमा स्थानीयले विवाद गर्दै आएका छन् ।
विगतमा स्थानीयको अवरोधका कारण सर्भेको काम रोकिएको थियो । स्थानीयको विरोधकै कारण रेल विभागले स्थानीयसँगको समन्वयलाई प्राथमिकतामा राखेको छ । यसै कारण बारम्बार एलाइनमेन्ट परिवर्तन हुँदै आएको छ ।
पछिल्लो एलाइनमेन्टबाट वन क्षेत्र मासिने र चुरे पहाड प्रभावित हुने स्थानीयको भनाइ छ । नयाँ एलाइनमेन्टमा पुनर्विचार गर्न उनीहरूले माग गरेका छन् ।
यसअघि पनि स्थानीको विरोधका कारण एलाइनमेन्ट फेरिएको थियो । निजगढको घना बस्ती मासिने भन्दै स्थानीयले रेलमार्ग पीडित सरोकार समिति बनाएर विरोध गरेका थिए । स्थानीयको सरोकार सम्बोधन गर्न भन्दै रेल विभागले बकैया खोलाको किनारबाट एलाइनमेन्ट जाने बताएको थियो ।
त्यसबेला स्थानीयले प्रशासनदेखि प्रधानमन्त्रीको कार्यालयसम्म आफ्ना मागपत्र पुर्याएका थिए । उनीहरूले ठाउँठाउँमा प्रदर्शनसमेत गरेका थिए । रेलमार्गको सर्भेसमेत रोकिएको थियो । अब रेलमार्गको सर्भे अगाडि बढाइने भएको छ । रेलमार्गका लागि कम्तीमा ५० मिटर चौडाइको भूभाग चाहिने र ३५० मिटर दाँया–बाँया क्षेत्रफललाई समेटेर सर्भे गर्नुपर्ने पोखरेलले बताए ।
(1)(1)(1).jpg)
