एमालेको उद्योग वाणिज्य विभाग दुगड र प्रसाइँको काँधमा

नेकपा एमालेले पार्टीका नेताहरुको कार्यविभाजन गर्दा उद्योग, वाणिज्य तथा आपुर्ति विभागमा पनि नेतृत्व टुंग्याएको छ । एमालेले १० औँ राष्ट्रिय महाधिवेशनपछि पहिलो अन्तरपार्टी निर्देशन (अपानि) जारी गर्दै उद्योग, वाणिज्य तथा आपुर्ति विभागको प्रमुख र उपप्रमुख टुंगो लगाएको हो ।एमालेले यो विभागको प्रमुख र उपप्रमुखको जिम्मेवारी चर्चित उद्योगी र व्यापारीलाई दिएको छ । विभागको प्रमुखमा उद्योगी मतिलाल दुगड छन् भने उपप्रमुखमा मेडिकल व्यवसायी दुर्गा प्रसाइँ रहेका छन् । प्रमुख रहेका दुगड केपी ओली प्रधानमन्त्री हुँदा उद्योग राज्यमन्त्री बनेका थिए । पछि शक्ति सन्तुलनमा उद्योग मन्त्रालयको जिम्मेवारी आफूलाई साथ दिएका लेखराज भट्टलाई दिएर ओलीले दुगडलाई आफ्नो प्रमुख आर्थिक सल्लाहकार बनाएका थिए । उपप्रमुख प्रसाइँ भने आइतबार मात्रै सकिएको एमालेको दोस्रो केन्द्रीय कमिटी बैठकबाट केन्द्रीय सदस्यमा मनोनित भएका व्यवसायी हुन् । उनी झापाको बि.एण्ड.सी. मेडिकल कलेजका सञ्चालक हुन् । नेकपा एकताको समयमा ओली र प्रचण्डलाई एकै ठाउँमा राखेर मार्सी चामलको खाना खुवाएको तस्बिर बाहिरिएपछि प्रसाइँ ‘भाइरल’ बनेका थिए ।