जेठ २१, काठमाडौं । अर्थमन्त्री जनार्दन शर्माले देश विकासको काममा कसैले बाधा अवरोध गर्न नहुने भन्दै सिंगो मधेसलाई जोड्न पनि निजगढ अन्तरराष्ट्रिय विमानस्थल आवश्यक रहेको बताएका छन् ।
शनिवार आयोजित वीरगञ्ज उद्योग वाणिज्य संघको ४६ औं साधारण सभामा बोल्दै उनले राज्यको ठूलो धनराशी खर्च भइसकेको निजगढ विमानस्थल निर्माणका लागि सरकारले कुनै कसुर बाँकी नराख्ने बताए । उनले अवको केहि वर्षमा काठमाडौं - निजगढ द्रुतमार्ग निर्माण पुरा भइसक्ने भन्दै यसको निर्माणले मधेस प्रदेशमा विकासले फड्को मार्ने बताए ।
अर्थमन्त्री शर्माले त्रिभुवन विमानस्थलको विकल्पको रूपमा मात्र नभएर सिंगो मधेस र मुलुककै सर्वांगीण आर्थिक विकासका लागि निजगढ विमानस्थल आवश्यक रहेको बताए । उनले भने, ‘मधेसलाई काठमाडौंसँग छोटो दूरीमा जोड्ने द्रुतमार्ग बनिरहेको छ । यसमा केवल गाडी मात्र कुदाउने होइन, सो द्रुतमार्गमा राष्ट्रिय–अन्तरराष्ट्रिय यात्रुहरूलाई पनि आवातजावत गराउने हो’ उनले भने ।
उनले देश बनाउने उद्धेष्यले आगामी आर्थिक वर्षको बजेट ल्याइएको बताएका छन् । साथै उनले सरकारले ल्याएको बजेट मुलुकको हिततर्फ मात्रै केन्द्रित रहेको बताए ।
निजी क्षेत्रको हितका लागि जतिखेर पनि कार्य गर्न सरकार तत्पर रहेको भन्दै उनले सरकार र निजी क्षेत्र एक अर्काका परिपूरक भएको बताए ।
उनले उद्योगधन्दा सञ्चालनको क्रममा कहाँनिर समस्या आउँछ त्यसको बारेमा सरकारलाई खुलेर अवगत गराउन पनि उद्योगी व्यवसायीलाई आग्रह गरे ।
उनले कुनै पनि उद्योग बन्द हुन नहुने भन्दै सरकार प्राथमिक कच्चा पदार्थमा अधारित उद्योगलाई प्रवर्द्धन गर्ने पक्षमा रहेको बताए ।
उनले देशको विकास तिव्र गतिमा अगाडि बढाउन पूर्वाधार निर्माणका काममा बैदेशिक लगानी आवश्यक रहेको भन्दै सरकार यसकै पक्षमा रहेको बताए ।
