नेपाल राष्ट्र बैंकले सुन आयातको कोटा घटाएको छ। राष्ट्र बैंकको विदेशी विनिमय ब्यबस्थापन विभागले आज आइतबार निर्देशन जारी गर्दै सुन आयातको कोटा घटाएको हो। जस अनुसार अब दैनिक १० किलोग्राम सुन मात्र आयात गर्न सकिने छ। यस अघि दैनिक २० किलोग्राम सुन आयात गर्न सकिने ब्यबस्था थियो । विदेशी विनिमय संचिति घट्दो क्रममा रहेको र विदेशी विनिमय संचितिको ठूलो हिस्सा सुन आयातमा प्रयोग हुन थालेपछि राष्ट्र बैंकले सुन आयातमा कडाई गरेको हो । अन्तराष्ट्रिय बजारमा सुनको मूल्य निरन्तर बढ्दै गएको छ । रुस र युक्रेनबीच युद्द सुरु भएपछि सुनको मूल्य निरन्तर बढ्दो छ । नेपाली बजारमा आज आइतबार सुनको मूल्य तोलामा १ लाख रुपैयाँ नाघेको छ । शुक्रबार तोलाको ९९ हजार ९ सय रुपैयाँमा कारोबार भएको छापावाला सुनको भाउ आज तोलामा २ हजार रुपैयाँले बढेर प्रतितोला १ लाख १ हजार ९ सय रुपैयाँ पुगेको छ । आज तेजाबी सुनको भाउ पनि तोलामा २ हजार रुपैयाँले नै बढेर प्रतितोला १ लाख १ हजार ४ सयमा कारोबार भईरहेको छ । आज चाँदीको भाउ तोलामा ३५ रुपैयाँले बढेर तोलाको १४ सय १५ रुपैयाँ पुगेको छ ।नेपाल सुनचाँदी व्यवसायी महासंघले आज प्रति १० ग्राम छापावाला सुनको भाउ ८७ हजार ३६५ रुपैयाँ, प्रति १० ग्राम तेजावी सुनको भाउ ८६ हजार ९३५ रुपैयाँ र प्रति १० ग्राम चाँदीको भाउ १२ सय १३ रुपैयाँ कायम गरेको छ ।
