चैत १३, काठमाडौं । प्राइम लाइफ इन्स्योरेन्स कम्पनी लिमिटेडले संस्थापकतर्फ हाल कायम ७० प्रतिशत शेयर स्वामित्व घटाएर ६० प्रतिशत कायम गर्ने भएको छ ।
कम्पनीले संस्थापकतर्फ ६० प्रतिशत र सर्वसाधारणतर्फ ४० प्रतिशत शेयर स्वामित्व कायम हुने गरी संस्थापकतर्फको १० प्रतिशत शेयर सर्वसाधारणमा परिणत गर्न लागेको हो ।
कम्पनीले गत मंसिर १९ गते सम्पन्न १४औं वार्षिक साधारण सभाबाट शेयर स्वामित्व परिवर्तनको प्रस्ताव पारित गरी नियामक निकाय बीमा समितिबाट पनि स्वीकृति प्राप्त गरिसकेको जानकारी दिएको छ ।
यसर्थ, आफ्नो शेयर परिवर्तन गर्न नचाहेमा यो सूचना प्रकाशित भएको मितिले सात दिनभित्र कम्पनीको प्रधान कार्यालयमा लिखित जानकारी गराउन संस्थापक शेयरधनीहरुलाई कम्पनीले आग्रह गरेको छ ।
तोकिएको मितिभित्र संस्थापक शेयरधनीहरुबाट लिखित जानकारी प्राप्त नभएमा प्रचलित कानून बमोजिम तोकिएको अनुपातमा सर्वसाधारण समूहमा संस्थापक तर्फको शेयर परिवर्तन गरिने जानकारी कम्पनीले दिएको छ ।
यस वर्ष कम्पनीले अघिल्लो आर्थिक वर्ष ०७६/७७ को मुनाफाबाट १५ प्रतिशत बोनस शेयर वितरण गरेको छ । १५ प्रतिशत बोनस शेयर वितरणपश्चात कम्पनीको चुक्तापूँजी रू. २ अर्ब ७७ करोड ९६ लाख १६ हजार पुगेको छ ।