असार १९, चितवन । पहिरो पन्छाएपछि तीन दिनपछि नारायणगढ मुग्लिन सडकखण्ड एकतर्फी रुपमा सञ्चालनमा आएको छ ।
जिल्ला ट्राफिक कार्यालय चितवनका अनुसार चारकिलो,पाँचकिलो,सेतिदोभान,घोप्टेभीर र कुरिनटारमा गएको पहिरोको कारण उक्त सडकखण्ड दुईतर्फी अवरुद्ध बनेको थियो ।
सो अवधिमा आंशिक रुपमा एकतर्फी रुपमा खुलेपनि बिहान सवा ९ बजे यी स्थानहरुको पहिरो पन्छाएर एकतर्फी रुपमा ल्याउन सकिएको ट्राफिक प्रमुख भगवानराज थापाले जानकारी दिए ।
सेती दोभानमा ठूलो पहिरो गएको र दासढुंगा नजिक ठूलो ढुंगा खसेकोले दुईतर्फी खुल्न अझै समय लाग्ने थापाले बताए । ‘एकतर्फी त सञ्चालनमा ल्याएका छौं थापाले भने, दुईतर्फी सञ्चालनमा आउन त एकहप्तानै लाग्ला ।’ उनका अनुसार सेती दोभानमा पहाडनै खसेकोले सबै पहिरो पन्छाएर सञ्चालनमा आउन समय लाग्ने भएको हो ।
दासढुंगा नजिक खसेको ठूलो ढुंगा भने फुटाउने काम भइरहेको उनले बताए । हाल अत्यावश्यक काम र विवाहका बसहरु गन्तव्यतर्फ पठाइएको ट्राफिक प्रहरीले बताएको छ ।
सवारीको अत्याधिक चाप बढेकोले ट्राफिक प्रहरीले चालकलाई आफनो लेन अनुसार र ट्राफिक संकेतको पालना गरी सवारी साधन सञ्चालन गर्न अनुरोध गरेको छ ।
