एमएडब्लू वृद्धिले ओएसएमका विद्युतीय सवारी भित्र्याउँदै

काठमाडौं (अस) । नेपाली बजारमा विभिन्न ब्रान्डका कमर्सियल तथा प्यासेन्जर सवारी बिक्री गर्दै आइरहेको एमएडब्लू वृद्धिले ओमेगा सिक्की मोबिलिटी (ओएसएम) का विद्युतीय सवारी बजारमा ल्याउने भएको छ । त्यसका लागि ओएसएम र एमएडब्लू वृद्धि कमर्सियल भेहिकलबीच आधिकारिक बिक्रेताको सम्झौता भएको हो । दुई कम्पनीबीच केही दिनअघि आधिकारिक साझेदारीको सम्झौता भएको थियो । एमएडब्लू वृद्धिले अबको केही समयभित्रै ओएसएमका तीनपांग्रे विद्युतीय सवारी नेपाली बजारमा ल्याउनेछ । वातावरण सुरक्षामा प्रतिबद्ध रहेको र नेपाललाई सुहाउँदा विद्युतीय सवारी भित्र्याउन लागेको कम्पनीले बताएको छ । पहिलो चरणमा एमएडब्लू वृद्धिले थ्री ह्वीलर सवारी भित्र्याउने योजना बनाएको छ । ओएसएमले उत्पादन गरेका उच्च प्रविधियुक्त विद्युतीय सवारीले देशले अँगालेको विद्युतीकरणको अभियानमा सहयोग पुग्ने कम्पनीको भनाइ छ । ओमेगा सिक्की मोबिलिटी (ओएसएम) एंगलियन ओमेगा ग्रुप अफ बिजनेसको सदस्य हो, जसले भारत र अन्य मुलुकमा  अटोमोटिभ र इन्जिनियरिङ उद्योगका लागि स्टिल पार्ट्स निर्माण गरिरहेको छ । यो समूहले पछिल्लो ५ वर्षमा अटोमोटिभ, पूर्वाधार, उच्च प्रविधिको डिजाइन र विकासका धेरै परियोजना ठूलो लगानीका साथ विस्तार गरेको छ । विद्युतीय सवारी साधनको व्यवसाय समूह कम्पनी ओमेगा सेकीले आनो इन–हाउस आर एन्ड डी सुविधामा थ्री ह्वीलर सवारी साधन आकर्षक डिजाइनमा विकास गरेको छ ।