चितवन । उद्योग वाणिज्य संघ, चितवन र फेन्सी व्यवसायी संघ, चितवनको संयुक्त आयोजनामा सोमबार एक दिने मोटिभेसनल सेमिनार सम्पन्न भएको छ । फेन्सी उद्यमी व्यवसायीहरूलाई लक्षित गरी व्यावसायिक सशक्तीकरणका लागि उत्प्रेरित गर्ने उद्देश्यले सेमिनार आयोजना गरिएको हो ।
कार्यक्रममा उद्योग वाणिज्य संघ, चितवनका वरिष्ठ उपाध्यक्ष सुमनकुमार श्रेष्ठले व्यावसायिक जटिलता सिर्जना भएको अवस्थामा यस किसिमको उत्प्रेरणात्मक कार्यक्रमले व्यावसायिक उत्थानमा सहयोग पु¥याउने अपेक्षा व्यक्त गरे । उनले व्यावसायिक हितका सम्बन्धमा संघ सदैव प्रतिबद्ध रहेको बताए ।
मोटिभेसनल सेमिनारका प्रमुख प्रशिक्षक रञ्जीतराज आचार्यले परिणामको आशा नगरी प्रयास गरिरहे अवश्य राम्रो परिणाम आउने बताउँदै नकारात्मक विचारलाई सकारात्मक बनाउनेतर्फ उत्प्रेरणा दिएका थिए ।
सोही अवसरमा फेन्सी व्यवसायी संघद्वारा प्रकाशित फेन्सी सन्देश अर्धवार्षिक बुलेटिनको विमोचन गरिएको थियो । फेन्सी व्यवसायी संघका प्रवक्ता विपिन रिजालकोे संयोजनमा भएको कार्यक्रममा उद्योग वाणिज्य संघ, चितवनका उपाध्यक्षत्रय चिरञ्जीवी सुवेदी, राजेन्द्र ओली, सिरिश पन्तलगायको उपस्थिति रहेको थियो ।
