तनहुँ । दशैंमा तनहुँका सहकारीमार्फत करीब साढे ४ करोड रुपैयाँ बराबरका खसीबोका विक्री भएका छन् । महिलाले सञ्चालन गरेका सहकारीमार्फत दशैंमा मात्रै ४ करोड ३९ लाख ३४ हजार रुपैयाँको खसीबोका विक्री भएका हुन् ।
असोजमा ती सहकारीहरूले जिल्लाभित्र र जिल्लाबाहिर खसीबोका विक्री गरेका थिए । सहकारीले नै बजारीकरण गरिदिएपछि बाख्रापालक कृषकलाई सहज भएको छ । खसीबोका किन्न व्यापारी गाउँसम्मै पुग्ने गरेका छन् । घिरिङसुन्धारा सामाजिक उद्यमी महिला सहकारी संस्थाले ४६ लाख ५९ हजार, भगवतीपुर सामाजिक उद्यमी महिला सहकारीमार्फत ८४ लाख ३२ हजार, माझकोटस्थित माझकोट महिला विकास बहुउद्देश्यीय सहकारी संस्थामार्फत ८८ लाख ३८ हजार, अरुणोदय सामाजिक उद्यमी महिला सहकारीमार्फत २३ लाख ६६ हजार रुपैयाँ बराबरको खसीबोका विक्री भएका छन् ।
यसैगरी अतिप्रिय सामाजिक उद्यमी महिला सहकारी संस्थामार्फत ६७ लाख ७३ हजार, दिदीबहिनी कृषि सहकारी संस्थामार्फत सात लाख २५ हजार, शुभदीप सामाजिक उद्यमी महिला सहकारीमार्फत २८ लाख ३८ हजार, आधारशिला सामाजिक महिला उद्यमी सहकारीमार्फत ११ लाख ९६ हजार, सप्तधारा सामाजिक उद्यमी महिला सहकारीमार्फत ५० लाख ७५ हजार, भागिरथी सामाजिक उद्यमी महिला सहकारीमार्फत ३० लाख २८ हजारको खसी विक्री भएको छ ।
ती सहकारीमार्फत् एक हजार ४८८ खसीबोका विक्री भएका छन् । घिरिङ गाउँपालिका–२ भोरकोटस्थित घिरिङसुन्धारा सामाजिक उद्यमी महिला सहकारीकी अध्यक्ष शारदा आलेले सहकारीबाटै बजारीकरण गर्दा कृषकलाई सहज हुने गरेको बताइन् । यस्तै भिमाद नगरपालिका–२ स्थित अरुणोदय सामाजिक उद्यमी महिला सहकारीकी अध्यक्ष सीताकुमारी तिमिल्सिनाले खसीबोका बिक्रीका लागि विगत वर्षदेखि नै बजारीकरणमा सहयोग पु¥याएको बताइन् । सहकारीले बजारीकरणमा सहयोग पु¥याएपछि बाख्रापालक कृषक पनि खुशी भएका छन् । रासस
