लुम्बिनीको विकास र प्रवर्धनका लागि प्रदेश सरकारहरुले सहकार्य गरेर अगाडि बढ्ने प्रतिबद्धता ब्यक्त गरेका छन् । लुम्बिनीको अध्ययन भ्रमण पश्चात मुलुकका सातै प्रदेशका मन्त्री सचिवहरुले यस्तो प्रतिबद्धता व्यक्त गरेका हुन् । सातै प्रदेशका मन्त्री, सचिव तथा महान्यायाधिवक्ताहरुलाई लुम्बिनी विकास कोषका कोषाध्यक्ष सुरेन्द्रमुनि शाक्यले स्वागत गर्दै बुद्ध जन्मस्थल लुम्बिनीको बारेमा जानकारी गराउनुभएको थियो ।
लुम्बिनी प्रदेशका आन्तारिक मामिला तथा कानूनमन्त्री कुलप्रसाद केसी, गण्डकी प्रदेशका आन्तरिक मामिला तथा कानूनमन्त्री हरिबहादुर चुमान, प्रदेश १ का आन्तरिक मामिला तथा कानूनमन्त्री हिम्मत कुमार कार्की, कर्णाली प्रदेशका आन्तरिक मामिला तथा कानून मन्त्री नरेश भण्डारीले लुम्बिनीको अध्ययन भ्रमण गर्दै सहकार्य र एकताको प्रतिबद्धता व्यक्त गर्नुभएको हो ।
त्यसैगरी, प्रदेश १, प्रदेश २, बागमती प्रदेश, गण्डकी प्रदेश, लुम्बिनी प्रदेश, कर्णाली प्रदेश र सुदुरपश्चिम प्रदेशका सचिवहरु तथा महान्यायाधिवक्ताहरुले अध्ययन अवलोकन भ्रमण गर्नुभएको कोषका बरिष्ठ प्रशासकीय अधिकृत ज्ञानिन राईले बताउनुभयो ।
लुम्बिनी भ्रमणको लागि आउनुभएका मन्त्री, सचिव तथा महान्याधिवक्ताहरुलाई लुम्बिनी विकास कोषका सूचना तथा जनसम्पर्क प्रमुख डा. हरिध्वज राईले ‘लुम्बिनी गुरुयोजना र बुद्धिज्म’को बारेमा जानकारी गराउनुभएको थियो ।
