काठमाडौं । सूचनाप्रविधि कम्पनी इन्फोडेभलपर्स प्रालि र मर्कन्टाइल अफिस सिस्टम्स प्रालिबीच रणनीतिक सहकार्य भएको छ । बैंक तथा वित्तीय संस्थालाई गुणस्तरीय र भरपर्दो सेवा प्रदान गर्न यी दुई कम्पनीबीच सहकार्य गरिएको हो ।
सहकार्यसँगै मर्कन्टाइलको पुमोरी (पुमोरी शाखा) सफ्टवेयर इन्फोडेभलपर्ससँग मर्ज भएको छ । मर्ज भएसँगै इन्फोडेभलपर्स एमओएस प्रालि नामक नयाँ कम्पनीबाट पुमोरी सफ्टवेयरको व्यवस्थापन तथा सेवा प्रदान हुनेछ । रणनीतिक साझेदारीले सहकारीदेखि लघुवित्त र बैंकहरूको डिजिटल इकोसिस्टम विकासमा सहयोग पुग्ने विश्वास इन्फोडेभलपर्स एमओएसले लिएको छ । डिजिटल जगत्लाई सुहाउँदो नयाँ र भरपर्दो प्रणालीको विकास गर्ने लक्ष्य इन्फोडेभलपर्स एमओएसले राखेको छ । दुवै कम्पनीको राम्रा पक्षलाई प्रयोग गरी चाँडै नयाँ प्रडक्ट तथा फिचरहरू ल्याइने बताइएको छ ।
नयाँ कम्पनी इन्फोडेभलपर्स एमओएस प्रालिको अध्यक्षमा सञ्जीव राजभण्डारी नियुक्त भएका छन् । त्यस्तै प्रमुख कार्यकारी अधिकृतमा उमेश रघुवंशी र सह प्रमुख कार्यकारी अधिकृतमा सुरेन्द्र वज्राचार्य नियुक्त भएका छन् ।
नेपालको आईटी तथा बैंकिङ क्षेत्रका लागि नयाँ आयाम शुरू गर्न पाउँदा गर्व महसूस भएको कम्पनीले बताएको छ । परिवर्तन चुनौतीपूर्ण भए पनि ग्राहक तथा साझेदारलाई सहज बनाउने कम्पनीको प्रतिबद्धता छ ।