जेठ ४, काठमाडौं । कुवेतको अग्रणी एयरलाइन जजीरा एयरवेजले मध्य–पूर्व, एशिया र यूरोपमा पनि आफ्नो उडान सेवा विस्तार गरेको छ ।
जजीराले भैरहवास्थित नव–निर्मित गौतम बुद्ध अन्तरराष्ट्रिय विमानस्थलबाट आफ्नो उडान सेवाको शुरुवात गरेको हो ।
यसबाट मध्य–पूर्व र यूरोप बसोबास गर्ने ठूलो समुदाय नेपालको दक्षिण–पश्चिम क्षेत्रमा प्रत्यक्ष रुपमा जोडिन सक्ने जजिराको विश्वास छ ।
यो नेपालमा जजीराको दोस्रो उडान सेवा हो । यसले नेपालको तराई क्षेत्रमा बढ्दै गईरहेको यात्रुहरुको आवश्यकतालाई सम्बोधन गर्ने विश्वास छ ।
नयाँँ हवाइ रुटको बारेमा बोल्दै जजीरा एयरवेजका भाईस प्रेसिडेन्ट श्री रविन्द्रन भाराथनले भने, 'जजीरा एयरवेजले निरन्तर आफ्नो सञ्जाल विस्तार गर्दै नयाँँ–नयाँँ गन्तव्यहरु थप्दै गईरहेको छ । यसले गर्दा कुवेत र मध्य–पूर्वको सिधा रुटले सेवा दिन नसकेका यात्रुहरुलाई प्रत्यक्ष लाभ पुग्नेछ । अब नेपाली एवम् विदेशी पर्यटकहरुलाई पनि विदेशबाट सिधै तराई जान धेरै सजिलो भएको छ ।'
यो हवाइ सेवाले गौतम बुद्धको जन्मस्थल लुम्बिनीमा प्रत्यक्ष उडान सेवा प्रदान गर्नेछ ।
आरआर ग्रुप अफ कम्पनिजको भगीनी संस्था सोसाइटी इन्टरन्यासनल ट्राभल सर्भिसेजका अध्यक्ष रवीचन्द्र सिंहले भने, “७४ वर्षसम्म काठमाडौँमा मात्र भर परेको अन्तरराष्ट्रिय उडान अब यो हवाइ सेवाको विस्तारसँगै नेपालको पश्चिम भागमा ठूलो परिवर्तन ल्याउनेछ, साथै यसले भैरहवाको आन्तरिक पर्यटनमा पनि टेवा पुर्याउनेछ ।'
