काठमाडौं । फागुनमा जम्मा १७ कारोबार दिन मात्र धितोपत्र दोस्रो बजार सञ्चालन भएको छ । साताको पाँच कारोबार दिन सञ्चालन हुने धितोपत्र दोस्रो बजार फागुनमा सार्वजनिक बिदा बढी परेकाले कम कारोबार दिन मात्र सञ्चालनमा आएको थियो ।
माघ मसान्तसम्मको तुलनामा समग्र धितोपत्र दोस्रो बजार मापक नेप्से परिसूचक १६८ दशमलव ८१ अंक घटेको छ । माघ मसान्तसम्म २ हजार १२१ दशमलव ८७ विन्दुमा रहेको नेप्से परिसूचक फागुन मसान्तसम्म १ हजार ९५३ दशमलव शून्य ६ विन्दुमा झरेको थियो । फागुन महीनाको १७ दिनको कारोबारमा नेप्से परिसूचक पाँच कारोबार दिन मात्र बढेको देखिन्छ ।
घटेको बजारमा यो महीना हिमालयन डिष्टिलरी लिमिटेडको सर्वाधिक रकमको शेयर कारोबार भएको छ । यो कम्पनीको रू. १ अर्ब २६ करोड ७३ लाख बराबरको ५ लाख ५५ हजारभन्दा बढी कित्ता शेयर कारोबार भएको हो । सर्वाधिक रकमको कारोबार भएको फागुनमा हिमालयन डिष्टिलरीको शेयर मूल्य भने प्रतिकित्ता रू. ५३९ ले घटेको देखिन्छ ।
माघ मसान्तसम्म रू. २ हजार ६०५ रहेको हिमालयन डिष्टिलरीको शेयर मूल्य फागुन मसान्तसम्म भने प्रतिकित्ता रू. २ हजार ६६ मा झरेको हो । मूल्यमा आएको कमिलाई आधार मान्दा हिमालयन डिष्टिलरीको शेयरमा फागुनमा विक्री चाप बढी देखिएको छ ।
हिमालयन डिष्टिलरीपछि सर्वाधिक रकमको कारोबार हुने दोस्रो कम्पनीमा एनआईसी एशिया बैंक रहेको छ । अघिल्लो दुई आर्थिक वर्ष लगानीकर्तालाई लाभांश नदिई हात खाली बनाएको एनआईसी एशिया बैंकको फागुनमा मात्र रू. ८४ करोड २० लाखभन्दा बढीको शेयर कारोबार भएको छ ।
बैंकको उक्त रकम बराबरको १० लाख ५१ हजारभन्दा बढी कित्ता शेयर कारोबार भएको हो । माघ मसान्तसम्मको तुलनामा एनआईसी एशिया बैंकको शेयर मूल्य प्रतिकित्ता रू. ५५ दशमलव ९० ले घटेको छ । माघ मसान्तसम्म प्रतिकित्ता रू. ८२० दशमलव ९० रहेको बैंकको शेयर मूल्य फागुन मसान्तसम्म भने प्रतिकित्ता रू. ७६४ मा झरेको हो ।
फागुनमा सर्वाधिक रकमको कारोबार गर्ने दश कम्पनीभित्र हिमालयन डिष्टिलरी र एनआईसी एशिया बैंकसँगै शिवम् सिमेन्ट, नबिल बैंक, ङादी ग्रुप पावर, अपि पावर, अपर तामाकोशी, युनिभर्सल पावर, छिमेक लघुवित्त र अरुण भ्याली हाइड्रोपावर रहेको छ । सर्वाधिक कारोबार गर्ने दश कम्पनीमध्ये जलविद्युत् कम्पनीहरूकै वर्चश्व देखिन्छ । धितोपत्र दोस्रो बजारमा हाल ६७ जलविद्युत् कम्पनीहरू सूचीकृत छन् ।
जलविद्युत कम्पनीहरूले पछिल्लो समय कर्जा तिर्नकै लागि हकप्रद जारी गर्न पाउने व्यवस्था लागू भएसँगै हकप्रद शेयरलाई प्राथमिकतामा राखेर अघि बढेको अवस्था छ । करिब एक दर्जन जलविद्युत् कम्पनीले हकप्रद शेयर निष्कासनको तयारी गरेका छन् । कम्पनीको लाभांश र हकप्रद शेयरमा लगानीकर्ताको लगाब सधैं रहेको देखिन्छ ।
दैनिक धितोपत्रमा देखिएको उतारचढावसँगै लगानीकर्ताहरूले कम्पनीहरूले सार्वजनिक गरेको लाभांश र हकप्रदका लागि पनि धितोपत्र खरीद गर्ने गर्दछन् । जलविद्युत् कम्पनीको शेयरमा लगानीकर्ताको आकर्षण बढ्नुको पछि भने हकप्रद शेयर निष्कासन प्रक्रियालाई नै जानकारीहरूले कारण बनाएका छन् । धेरैजसो जलविद्युत्को शेयर मूल्य अन्य क्षेत्रका कम्पनीको तुलनामा कम रहेकाले पनि लगानीकर्ता यस क्षेत्रको शेयरप्रति आकर्षित भएको हुन सक्ने अनुमान जानकारहरूको छ ।
फागुनमा सर्वाधिक कारोबार गर्ने १० कम्पनी
