जेठ ११, काठमाडौं । साताको तेस्रो कारोबार दिन नेप्से परिसूचक १४ दशमलव ३७ अंक बढेर वन्द भएको छ ।
यो दिन नेप्से परिसूचक २ हजार २३१ दशमलव ५७ विन्दुमा बन्द भएको हो । यो दिन कारोबारमा आएका २२६ ओटा धितोपत्रको २६ लाख ९४ हजार ४२९ कित्ता शेयर २२ हजार ३१ पटकमा रू. १ अर्ब ४ करोड ४६ लाख २६ हजार ९३९ दशलमव ४६ बराबरको शेयर किनबेच भएको छ ।
मंगलवार सरकारले प्रस्तुत गरेको नीति तथा कार्यक्रममा पूँजी बजारलाई प्रथामिकता दिएको छ । सोही कारण बुधवार बजारमा सकारात्मक प्रभाव परेको देखिन्छ । केही दिन यता बजार धेरै नै घटिसकेको छ र कम्पनीहरुको शेयर मूल्य न्यून विन्दुमा झरेको छ । यसले गर्दा पनि अब बजारमा विस्तारै खरीदकर्ता आउनेछन् ।
यसोत पछिल्लो समय वित्तीय प्रणालीमा तरलता अभाव लगायत नीतिगत सुधार हुन नसक्दा नराम्रोसँग प्रभावित भएको हो । विशेष गरी शेयर धितो कर्जामा ४-१२ करोडको सीमा लागू र बैंकलाई अल्पकालिन रुपमा शेयर कारोबारमा बन्देज लगाएसँगै बजार प्रभावित भएको थियो ।
अब यी नीतिगत विषयलाई आगामी बजेट मार्फत संशोधन गरेमा शेयर बजार फेरी उकालो यात्रा गर्ने शेयर विश्लेष बताउँछन् । यद्धपि बजार घटबढ भइरहन्छ । कारोबारमा आएका २२६ धितोपत्रमध्ये सबैभन्दा बढी बलेफी हाइड्रोपावरको शेयरमूल्य ५ दशमलव ९२ प्रतिशत वृद्धि भएको छ ।
कम्पनीको शेयरमूल्य प्रतिकित्ता रू. ११० दशमलव ९० पुगेको हो । यस कम्पनी धितोपत्रको दोस्रो बजारमा आएको बुधवार पहिलो दिन हो । सोही कारण पनि कम्पनीको शेयरमा खरीदकर्ता आकर्षित भएका हुन् ।
त्यसैगरी दोस्रोमा मैलुङखोला जलविद्युत् कम्पनीको शेयरमूल्य ५ दशमलव ८४ प्रतिशत वृद्धि भएर रू. ५२९ पुगेको छ । त्यसैगरी बुधवार कर्पोरेट डेभलपमेण्ट बैंकका शेयरधनीले धेरै गुमाएका छन् ।
कम्पनीको शेयरमूल्य सबैभन्दा बढी ७ दशमलव १३ प्रतिशत घटेसँगै धेरै गुमाएका हुन् । कम्पनीको शेयरमूल्य प्रतिकित्ता रू. ३९२ मा झरेको हो । त्यसैगरी दोस्रोमा लक्ष्मी लघुवित्त वित्तीय संस्थाको शेयरमूल्य ३ दशमलव ४९ प्रतिशत घटेर रू. १ हजार २७० दशमलव १० कायम भएको छ ।
बुधवार सर्वाधिक शेयर खरीदविक्री अपर तामाकोशी हाइड्रोपावर कम्पनीको भएको हो । कम्पनीको रू. ८ करोड ३४ लाख बराबरको शेयर खरीदविक्री भएको हो । कम्पनीको शेयरमूल्य प्रतिकित्ता रू. ५२९ दशमलव ९० कायम भएको छ । त्यसैगरी सर्वाधिक शेयर खरीदविक्री हुने दोस्रो कम्पनीमा अरुण काबेली पावरको रू. ४ करोड ७१ लाख बराबरको भएको हो ।
कारोबारमा आएका १३ ओटा समूहगत परिसूचक बढेसँगै समग्र नेप्से परिसूचक बढेको हो । १३ समूहगत परिसूचक मध्ये सबैभन्दा बढी व्यापार समूहको परिसूचक १ दशमलव ५३ प्रतिशत वृद्धि भएको छ ।
त्यसैगरी अन्य समूहको शून्य दशलमव ५३ प्रतिशत, निर्जीवन बीमा समूहको १ दशमलव ४३ प्रतिशत, म्युचुअल फण्ड समूहको शून्य दशमलव ४८ प्रतिशत, लघुवित्त समूहको शून्य दशमलव ६४ प्रतिशत, उत्पादन तथा प्रशोधन समूहको शून्य दशमलव ५७ प्रतिशत, जीवन बीमा समूहको शून्य दशमलव ६२ प्रतिशत, लगानी समूहको शून्य दशमलव १६ प्रतिशतका दरले वृद्धि भएको छ ।
यसैगरी हाइड्रोपावर समूहको १ दशमलव १९ प्रतिशत, वित्त समूहको शून्य दशमलव ५८ प्रतिशत, विकास बैंक समूहको शून्य दशमलव ६६ प्रतिशत र बैंकिङ समूहको परिसूचक शून्य दशलमव ५३ प्रतिशतका दरले वृद्धि भएको हो । होटल एण्ड टुरिजम समूहको परिसूचक भने स्थिर रहेको छ ।
