काठमाडौं । नेपाल निर्माण व्यवसायी महासंघका नवनिर्वाचित अध्यक्ष रवि सिंहले हालै संशोधन भएको सार्वजनिक खरीद नियमावली–२०६४ को ११औं संशोधनलाई छिटोभन्दा छिटो कार्यान्वयनमा ल्याउन पहल गर्ने प्रतिबद्धता व्यक्त गरेका छन् । आइतवार सम्पन्न निर्वाचनबाट महासंघको नयाँ कार्यकालका लागि अध्यक्षमा निर्वाचित सिंहले निर्माण व्यवसायीले पाँचओटासम्म ठेक्का पाउने व्यवस्था कार्यान्वयनलाई आफूले उच्च प्राथमिकतामा राखेको बताएका छन् ।
सार्वजनिक खरीद नियमावलीको प्रभावकारी कार्यान्वयन, कामको असमान वितरण न्यूनीकरण र मूल्यवृद्धिका कारण भएको मर्कालाई सम्बोधन गर्ने कार्यलाई प्राथमिकतामा राखिएको उनले बताएका हुन् । यसैगरी सार्वजनिक खरीद ऐन छिटो संशोधन गराउनेतर्फ पनि पहल गर्ने उनको उद्घोष छ ।
शुक्रवारदेखि काठमाडौंको कमलादीस्थित प्रज्ञाभवनमा शुरू भएको महासंघको २३औं साधारणसभा र १२औं अधिवेशनले नयाँ नेतृत्व चयन गरेको छ । आइतवार राति आएको मत परिणामअनुसार अध्यक्षमा महासंघकै वर्तमान अध्यक्ष सिंह, महासचिवमा रोशन दाहाल र कोषाध्यक्षमा हरिणकुमार श्रेष्ठ निर्वाचित भएका छन् । वर्तमान पदाधिकारीसहितको प्यानल बनाएर चुनावमा आएका सिंहले दुई प्रतिस्पर्धी निकोलस पाण्डे र अर्का उम्मेदवार हुमनाथ कोइरालालाई ठूलो मतान्तरले पछि पारेका हुन् । सिंहलाई साना व्यवसायीको उल्लेख्य साथ रह्यो । अध्यक्षका प्रतिस्पर्धी पाण्डेले पनि प्यानल बनाएर चुनावमा उम्मेदवारी दिएका थिए भने कोइरालाले भने प्यानल बनाएका थिएनन् । यसैगरी सिंह प्यानलबाट वरिष्ठ उपाध्यक्षमा आङदोर्जी (एडी) लामा निर्वाचित भएका छन् । एशोसिएटतर्फको उपाध्यक्षमा रामजी पन्त विजय भएका छन् । यस्तै प्रदेश १ को उपाध्यक्षमा मोहनप्रसाद अधिकारी, मधेश प्रदेशमा शम्भु ठाकुर, बागमतीमा बालकृष्ण थापा, गण्डकीमा खिमप्रकाश मल्ल, लुम्बिनीमा टोपबहादुर रायमाझी, कर्णालीमा रत्नबहादुर खड्का र सुदूरपश्चिममा प्रकाशबहादुर सेठी निर्वाचित भएका छन् ।
