वैशाख ८, काठमाडौं । नेपाल धितोपत्र बोर्डले कोरोना भाइरसको संक्रमण बढेसँगै सम्पूर्ण धितोपत्र बजार तथा धितोपत्र व्यवसायीलाई सेवा प्रवाह गर्दा सावधानी अपनाउन अनुरोध गरेको छ ।
धितोपत्र बोर्डले बुधवार एक सूचना जारी गरेर कोरोनाको महामारी रोकथाममा सहयोग पुर्याउनका लागि सुरक्षित तरिकाले कार्य सञ्चालन गर्न भनेको हो ।
सोही अनुसार बोर्डले कार्यालय स्थलमा सेवाग्राही तथा कर्मचारीहरुलाई मास्क र सेनिटाइजरको प्रयोग अनिवार्य रुपमा गर्न पनि भनेको छ ।
नेपाल सरकारले तोके बमोजिमको स्वास्थ्य मापदण्डको पूर्ण रुपमा पालना गरी कार्यालयभित्र २५ जनाभन्दा बढी नहुने गरी सेवाग्राही बीच दुई मिटरको भौतिक दुरी कायम हुने गरी सेवा प्रवाह गर्नुपर्नेछ ।
साथै बोर्डले सभा सम्मेलन, गोष्ठी,सेमिनार,बैठक, तालीम प्रशिक्षण जस्ता क्रियाकलापहरु सञ्चालन गर्दा सकेसम्म अनलाइन तथा भर्चुअल माध्यमबाट गर्न भनेको छ ।
सेवा प्रवाहलाई निरन्तर रुपमा सुचारु गरी संस्थाका कर्मचारीहरुलाई स्वास्थ्य सुरक्षा सम्बन्धी मापदण्डको पालना गरी परिचालन गर्ने र सेवाग्राहीको भिडभाड कम गर्ने अभिप्रायले सकेसम्म सेवा प्रवाह गर्दा विद्युतीय माध्यमको प्रयोग गर्न पनि बार्डले निर्देशन दिएको हो ।
कोभिड - १९ को संक्रमणबाट बच्न तथा बचाउन सरकारको निर्देशन र यसअघि दिएका निर्देशनहरुको पनि पूर्ण पालना गर्न बोर्डद्वारा जारी सूचनामा उल्लेख छ । बोर्डले नेप्से, ब्रोकर क्रेडिट रेटिङ संस्थालाई पनि यही निर्देशन दिएको छ ।
