वैशाख ६, काठमाडौं । नेपाल उद्योग परिसंघले हाल नेपाल आर्थिक संकटको अवस्थामा नरहेको बताएको छ ।
साथै उसले आयातमा प्रतिबन्ध लगाउँदैमा अर्थतन्त्रमा आएको समस्या समाधान नहुने पनि बताएको छ । मंगलवार काठमाडौंमा पत्रकार सम्मेलन गर्दै परिसंघले हाल नेपाल आर्थिक संकटको अवस्थामा नरहेको तथा विदेशी मुद्रा सञ्चिति र तरलता व्यवस्थापनका लागि विभिन्न उपाए समेत औंल्याएको छ ।
साथै उसले गैर आवासीय नेपाली( एनआरएन) लाई निश्चित संख्या र स्थानमा विदेशी मुद्रामा अपार्टमेन्ट खरीद गर्न अनुमति दिनुपर्ने पनि बताएको छ ।
उसले विदेशी मुद्रामा जुनसुकै समयमा अपार्टमेन्ट विक्री गर्न पाउने व्यवस्था कायम गर्ने र निश्चित समय सीमा कायम गर्न दिन आवश्यक रहेको पनि बताएको छ । यसले गर्दा अपार्टमेन्ट खरीद गर्नेलाई दीर्घकालीन भिषा वा स्थायी बसोबासको प्रमाणपत्र उपलब्ध गराउने व्यवस्था समेत कायम गर्नुपर्ने उसको सुझाव छ ।
परिसंघका अध्यक्ष बिष्णु अग्रवालले एनआरएनहरुलाई नेपालमा पैसा राख्न प्रोत्सान गर्न गैरआवसीय नेपालीहरुलाई विदेशी मुद्रामा शेयर खरीद गर्न आईपीओको कुल रकममा १५ प्रतिशत कोटा सुनिश्चित गर्नुपर्ने बताए । साथै उनले तरलता कायम गर्न वा बढाउन सुनलाई कमोडिटी सरह बोण्ड बनाई लागू गर्नुपर्ने पनि बताए ।
‘सरकार तथा अनुमति प्राप्त वाणिज्य बैंकहरुले निश्चित दरका सुन बोण्ड जारी गरी भविष्यमा कायम हुने सुनको भाउमा सो समयमा खरिद बिक्री हुने व्यवस्था लागु गर्नुपर्छ’, अध्यक्ष अग्रावालले भने ।
उनका अनुसार निश्चित समयमा रकम दोब्बर हुने गरी नेपाल सरकारले नेपाल विकास ऋणपत्र जस्तो बोण्ड जारी गर्नुपर्छ ।
त्यस्तै रेमिट्यान्स बैंङ्किङ प्रणालीबाट भित्रने गरि रेमिट्यान्स भित्र्याउने कम्पनी तथा रेमिट गर्ने व्यक्तिलाई सहुलियत उपलब्ध गराउनु पर्ने सुझाव पनि परिसंघले दिएको छ । उसले नेपालमा लगानी आकर्षित गर्ने, हेजिङ नियमावली कार्यान्वयन गर्ने र नेपाली वस्तुको विदेशमा बजारीकरण गर्न विदेशमा लगानी खुला गरिनु पर्ने पनि बताएको छ ।
