सिटिजन्स बैंकद्वारा दुई ओटा आर्थिक वर्षको कर वापतको रकम बुझाउन अनुरोध

जेठ ३१, काठमाडौं । सिटिजन्स बैंक इन्टरनेशनल लिमिटेडले साविक तिनाउ मिसन डेभलपमेण्ट बैंकको बोनस शेयर वापत लाग्ने कर वापतको रकम भुक्तानी गर्न अनुरोध गरेको छ ।  सिटिजन्स बैंकले तिनाउ मिसन डेभलपमेण्ट बैंकलाई प्राप्ति गरी चैत  १४ गतेदेखि एकीकृत कारोबार शुरु गरेको हो । सिटिजन्स बैंकले तिनाउ मिसन डेभलपमेण्ट बैंकलाई १०० : ९६ को अनुपातमा शेयर आदानप्रदान गर्ने गरी प्राप्ति गरेको हो ।  तिनाउ मिसन डेभलपमेण्ट बैंकले गत आर्थिक वर्ष २०७६/ ७७ र अघिल्लो आर्थिक वर्ष २०७५/ ७६ का लागि वितरण गर्ने निर्णय गरेको बोनस शेयर सम्बन्धित शेयरधनीहरुको हितग्राही खातामै जम्मा गर्ने भएकाले कर वापतको रकम स्वयम् शेयरधनीहरुलाईनै जम्मा गर्न बैंकले आग्रह गरेको छ । बैंकले गत आर्थिक वर्ष ६ प्रतिशत र अघिल्लो आर्थिक वर्ष १२ प्रतिशत बोनस शेयर वितरणको प्रस्ताव पारित गरेको थियो । कर वापतको नगद लाभांश भने बैंकले नदिएकाले शेयरधनी आफैले जम्मा गर्नुपर्ने छ । बैंकले कर वापतको रकम जम्मा गर्न बाँकी शेयरधनीहरुले सिटिजन्स बैंक इन्टरनेशनल लिमिटेड नारायणहिटिपथ, काठमाडौंमा रहेको खातामा जम्मा गर्नुपर्ने छ । बैंकको शेयर रजिष्ट्रारमा सिबिआईएल क्यापिटल रहेको छ ।