यातायात व्यवस्था विभागले इम्बोस्ड नम्बर प्लेट जडानमा सहयोग गर्न आग्रह गरेको छ । विभागका महानिर्देशक नमराज घिमिरेले विश्वका अन्य विकसित देशहरुले जस्तै प्रविधिमा फड्को मार्न इम्बोस्ड नम्बर प्लेट लागू गरिएको बताएका छन् । ‘हामीलाई रहर लागेर अथवा सनक चढेर यो नीति कार्यान्वयनमा आएको होइन’ विभागका हाकिमले भने, ‘संसदले ऐन बनाएर इम्बोस्ड नम्बर प्लेट सम्बन्धी व्यवस्था गरेको छ। ऐनमा भएको व्यवस्था कार्यान्वयन गर्न हामीले जमर्को गरेका हौं ।’ उनले तोकिएको समय नै असार मसान्त भएकाले असार मसान्तसम्म यो काम नसकिए विभागलाई नै कारबाही हुने भएकाले आफूहरुले असार मसान्त भनिरहेको बताए ।‘हामीलाई दिएको समयसीमा अनुसार अबको १५ महिनामा २५ लाख सवारीमा इम्बोस्ड नम्बर प्लेट जडान गरिसक्नुपर्ने गरी सम्झौता भएको छ,’ उनी भन्छन्, ‘सम्झौता कार्यान्वयन नहुँदा भोलि सरकारलाई उत्पन्न हुनसक्ने आर्थिक तथा अन्य दायित्वका सम्बन्धमा जवाफ दिनुपर्ने हुँदा सरकारले हामीलाई दिएको जिम्मेवारी पूरा गर्ने हाम्रो प्रयास हो ।’विभागले शुक्रबार एक सूचना जारी गर्दै साउन १ गतेसम्म बागमती र गण्डकी प्रदेशमा दर्ता भएका सवारीले अनिवार्य इम्बोस्ड नम्बर प्लेट जडान गर्नुपर्ने र अन्यथा कारबाही गरिने बताएपछि यसको सर्वत्र आलोचना भईरहेको छ । संसदमा पनि विरोधका आवाजहरु आईरहेका छन् ।
