माघ २७, काठमाडौं । सरकारले अर्धवार्षिक समीक्षामार्फत २०७८/ ७९ को बजेटको आकार घटाएको छ ।
बिहीवार चालू आर्थिक वर्षको बजेटको अर्धवार्षिक समीक्षा गर्दै अर्थमन्त्री जनार्दन शर्माले नेपालको बजेट प्रणाली मै समस्या रहेको बताए । अब बजेटको आकार १५ खर्ब ४६ अर्ब २८ करोड रुपैयाँको हुनेछ । अर्थमन्त्रीले चालू आर्थिक वर्षका लागि संसदबाट पारित भएको बजेट ८६ अर्ब रुपैयाँ खर्च हुन नसक्ने भएकाले संशोधन गरिएको बताए ।
चालू आर्थिक वर्षमा सरकारले प्रतिस्थापन विधेयकमार्फत १६ अर्ब ३२ अर्ब ८३ करोड रुपैयाँको बजेट ल्याएको थियो । कुल विनियोजित बजेटको आकार घटाएर यो वर्ष कुल विनियोजनमध्ये ९४ दशमलव ७ प्रतिशत मात्रै खर्च गर्ने गरी बजेट संशोधन गरिएको सो अवसरमा जानकारी दिइएको छ ।
अर्थमन्त्री शर्माले माग उच्च हुँदा मन्त्रालयलाई दबाब बढेको बताए । उनले यो नयाँ अनुमानमा निर्वाचन खर्च, कोभिड खोप, अनिवार्य दायित्वलाई भने यथावत राखिएको बताएका छन् । संशोधित बजेट अन्तर्गत चालूतर्फ १० खर्ब ३५ अर्ब ४६ करोड खर्च गरिनेछ भने पूँजीगततर्फ ३ खर्ब ४० अर्ब ३२ करोड खर्च गरिने छ ।
उनले विकास खर्च बढ्न नसक्नुमा संरचनाको सुदृढीकरण प्रमुख समस्या रहेको भन्दै विभिन्न ऐन नियमहरु बाधकका रुपमा रहेको पनि बताए ।आयोजनाको प्राथमिकीकरण हुन नसकेको र श्रोत सुनिश्चितता बिनै योजना ल्याउने गरिंदा समस्या देखिएको उनले बताए । साथै उनले क्रिप्टो र भर्चुअल मुद्राको कारोबार नयाँ चुनौतीका रुपमा देखिएको पनि बताए ।
समीक्षा कार्यक्रममा राष्ट्र बैंकका गभर्नर महाप्रसाद अधिकारीले अर्थतन्त्र जोगाउन आयात निरुत्साहित गर्न बाध्य हुनुपरेको बताए। बिदेशी बिनिमय सञ्चिती घट्दै जाँदा आयात निरुत्साहित गर्नुपरेको उनको भनाइ थियो ।
