हकप्रद अनुमति दिँदा ५ मेगावाटको आयोजनाले अर्को ५० मेगावाट बनाउँदैछ : दिल्लीबहादुर सिंह

काठमाडौं । विद्युत नियमन आयोगका अध्यक्ष दिल्लीबहादुर सिंहले जलविद्युत आयोजनालाई हकप्रद शेयर जारी गर्न अनुमति दिएपछि ५ मेगावाटको आयोजनाले पनि ५० मेगावाटको अर्को आयोजना बनाउन सुरु गरेको बताएका छन् । स्वतन्त्र ऊर्जा उत्पादकहरूको संस्था, नेपाल (इप्पान)को २१ औं साधारणसभाको उद्‍घाटनमा बोल्दै अध्यक्ष सिंहले हकप्रदको अनुमति दिंदा राम्रो भएको बताएका हुन् । प्रधानमन्त्री पुष्पकमल दाहालको भारत भ्रमणमा ठूलो उपलबब्धी भएको सिंहको भनाइ छ ।  ‘हिजो ५० मेगावाट बिजुली किनिदिनुस भन्ने अवस्था थियो । २०० मेगावाट किन्दा पनि दङ्ग पर्थ्यौ । अहिले त एकैपटक १० हजार मेगावाटको सम्झौता भयो । यो निकै ठूलो उपलब्धी हो’ उनले भने । बंगलादेशसँग विद्युत व्यापारका लागि नेपाल र बंगलादेश दुवैले भारतसँग बाटो माग्ने र डेडिकेटेड प्रसारणलाइन आफै बनाउनुपर्नेमा उनको जोड छ । प्राइभेट सेक्टरको रफ्तार रनवेबाट टेकअफ गरेको र अव यसको उडान निकै टाढासम्म हुनेमा आफू विश्वस्त रहेको उनले बताए । निजी क्षेत्रले विद्युत व्यापार गर्ने कुरा आउँदा प्रसारणलाइनको कुरा आउँछ । तर ग्रीड कोड सम्बन्धी निर्देशिका बनाएको ४ महिनासम्म पनि सुझाव नआएको उनको भनाइ छ । अब इपानले सुझाव दिएर यसलाई अन्तिम रुपदिन सहयोग गर्न पनि उनले आग्रह गरे । नेपालमा विद्युत उत्पादन बढ्दै गएपनि यसको लागत बढ्दा उत्पादन पनि महँगिएको छ । तर अब उत्पादन लागत पनि घटाउँदै जानुपर्ने उनले बताए । त्यसका लागि विदेशमा रहेका पेनसन फण्डको पैसा ल्याएर जलविद्युतमा लगानी गर्न सके उत्पादन सस्तो हुने पनि उनको सुझाव छ । त्यसता फण्डको पैसा सस्तो ब्याजदरमा चलाउन पाइन्छ । नेपाललाई समृद्ध बनाउने क्षेत्र ऊर्जा नै हो, अहिलेसम्म निजी क्षेत्रलाई विश्वास नगर्नु दुखद : सिएनआई अध्यक्ष अग्रवाल नेपाल उद्योग परिसंघ (सिएनई)का अध्यक्ष बिष्णुकुमार अग्रवालले नेपाललाई समृद्ध बनाउने क्षेत्र ऊर्जा नै भएको बताएका छन् ।  सभामा बोल्दै अध्यक्ष अग्रवालले नेपालको समृद्धिको आधार ऊर्जा नै भएको बताएका हुन् । ‘भारतमा १० हजार मेगावाट र बंगलादेशले ५० मेगावाट विद्युत लिने समझदारी ऐतिहासिक छ । ’अग्रवालले भने, ‘तर नेपालमा निजी क्षेत्रलाई काम गर्न निकै अफ्ठेरो छ ।’ नेपालको अर्थतन्त्र अफ्ठ्यारो अवस्थामा भएपनि यसबाट बाहिर आउने आधार पनि ऊर्जा नै रहेको उनको भनाइ छ । ‘अहिले नेपालको सबै ध्यान ऊर्जामा केन्द्रित गर्नुपर्छ । चार तिर हात हालेर हुँदैन । नेपाललाई समृद्ध बनाउने र अहिलेको अफ्ठ्यारोबाट बाहिर निकाल्ने क्षेत्र ऊर्जा नै हो ।’ उनले भने । १० हजार मेगावाटका आयोजनाको पीपीए हुन बाँकी रहेको र अहिले पीपीए गर्दा ५/७ वर्ष अघि निर्माण सम्पन्न नहुने हुँदा तुरुन्त पीपीए खोल्नुपर्नेमा पनि उनले जोड दिए । कुल जडित क्षमताको ५० प्रतिशत भन्दा बढी ऊर्जा उत्पादनमा संग्लग्न निजी क्षेत्रलाई सरकारले अहिले पनि विश्वास गर्न नसकेकोमा उनले दुख व्यक्त गरे ।