विषाक्त घाँस खाँदा चितवनमा एउटै फार्मका सातओटा गाई मरे, १० लाख बराबरको क्षति !

चितवन । विषाक्त घाँस खाएका कारण भरतपुरमा एउटै गोठका सातओटा गाईबस्तु मरेका छन् । भरतपुर–११, नयाँकिरण टोलस्थित शुभ नारायणी गाई फार्ममा रहेका माउ बच्चा गरी ११ ओटा गाईमध्ये सातओटा गाई मरेका हुन् ।  फार्मका सञ्चालक शिव लामिछानेले गत आइतबार दिउँसो १२ बजेतिर घाँस खुवाएर दिउँसो २ बजेतिर पानी खुवाउने बेलामा गाई बिरामी भएको थाहा पाएको बताए । त्यसपछि घरायसी उपचार गरे पनि ठीक नभएपछि भेटेरिनरी अस्पतालमा खबर गरेको उनको भनाइ छ । त्यसपछि प्राविधिक आएर स्वास्थ्य जाँच गर्दा पनि ठीक नभएको लामिछानेले बताए ।  उनले आफ्नो फार्ममा आइतवार साँझ पाँचओटा र सोमवार साँझ दुईओटा गाई मरेको बताए । गाईमा र्‍याल काड्ने, जिब्रो बाहिर निकाल्ने र पेट फुल्ने समस्या देखिएपछि ढलेको र त्यसपछि मरेको उनको भनाइ छ । ‘दुईओ टा ब्याउने बेला भएको माउ, तीनओटा दुहुनो र दुईओटा कोरली गाई मर्याे,’ उनले भने, ‘अब त मेरो गोठ नै रित्तियो ।’  गोठमा रहेको अर्को कोरली गाई पनि बिरामी मंगलबारदेखि परेको छ । ‘गाई पाल्न थालेको १६ वर्षसम्म यस्तो समस्या खेप्नु नपरेको उनले बताए । गाई मर्दा करीब १० लाख रुपैयाँ क्षति भएको उनको भनाइ छ । भेटेरिनरी अस्पताल तथा पशु सेवा विज्ञ केन्द्रले पनि विषाक्त घाँसकै कारण गाई मरेको बताएको छ । ‘घाँस नै विषाक्त परेको जस्तो देखिन्छ,’ विज्ञ केन्द्रका प्रमुख सुशील केसीले भने, ‘त्यसबाहेक अन्य कुनै समस्या देखिएको छैन ।’ पोष्टमार्टम गरेर हेर्दा पनि अन्य समस्या केही नदेखिएको उनले बताए । घाँस नै विषाक्त भएपछि घाँस खाएका गाई मरेको र नखाएका जति बाँचेको उनले जानकारी दिए ।