नेपाली कांग्रेस र प्रमुख प्रतिपक्षी दल नेपाल कम्युनिष्ट पार्टी (एमाले) का शिर्ष नेताहरुबीच भएको छलफल सकिएको छ । वालुवाटार स्थिति प्रधानमन्त्री निवासमा भएको छलफलमा संसद्को गतिरोध अन्त्य र राजनीतिक निकासबारे छलफल भएको बताईएको छ ।छलफलपछि प्रतिक्रिया दिदै संचारमन्त्री ज्ञानेन्द्र कार्कीले संसद खुलाउने र संसदलाई ब्यबस्थित ढंगले चलाउने विषयमा छलफल भएको र एमालेले आफ्नो पुरानै माग दोहोर्याएको बताए । उनले एमालेले बैठकको अवरोध खुलाउने प्रतिवद्दता नजनाएको पनि बताए । यद्यपि उनले भोलि बस्ने समसद बैठकमा एमसीसीमाथिको प्रारम्भिक छलफल सुरु हुने बताए । उनले भने 'सरकार बन्न बहुमत चाहिन्छ, यदि कसैले सरकार मै रहेर सरकारले ल्याएको प्रस्तावमा मतबिभाजन गर्छ भने त्यस्तो सांसदको के काम?, सरकारले ल्याएका कुनै पनि प्रस्ताव पास नहुने अवस्था आउंछ । तर भोलि संसदमा एमसीसीमाथिको प्रारम्भिक छलफल सुरु हुन्छ ।' कांग्रेस र एमालेका शिर्ष नेताबीच आज दिउँसो पनि छलफल भएको थियो । कांग्रेस र एमालेबीच बिहीबार साँझ पनि वार्ता भएको हो । बैठकमा कांग्रेसको तर्फबाट प्रधानमन्त्री तथा पार्टी सभापति शेरबहादुर देउवा, उपसभापति पूर्णबहादुर खड्का, महामन्त्री गगन थापा सहभागी थिए । एमाललेबाट अध्यक्ष केपी ओली, वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल र सुवास नेम्वाङ सहभागी थिए। सत्ता गठबन्धनमा भएका अरु दलले एमसीसीमा साथ नदिए पछि कांग्रेसले एमालेको साथ खोजेको छ ।
