काठमाडौं । बुटवल पावर कम्पनी लिमिटेड ‘राष्ट्रिय उत्कृष्ट वार्षिक प्रतिवेदन प्रस्तुत पुरस्कार २०२२’ बाट सम्मानित भएको छ । नेपाल चार्टर्ड एकाउन्टेन्ट्स संस्था (आईक्यान)ले प्रदान गर्ने उक्त सम्मानमा कम्पनी पावर एण्ड इनर्जी क्षेत्रमा ‘गोल्ड अवार्ड’बाट सम्मानित भएको हो । आर्थिक वर्ष २०७८/७९ (२०२१/२२) मा कम्पनीले प्रकाशित गरेको वार्षिक प्रतिवेदनका आधारमा संस्थाको वित्तीय पारदर्शिता, जवाफदेहिता र सुशासनका लागि उक्त अवार्ड प्रदान गरिएको बताइएको छ ।
काठमाडौंमा आयोजित एक कार्यक्रममा शुक्रवार अर्थमन्त्री डा. प्रकाशशरण महत र आईक्यानका अध्यक्ष भाष्कर सिंह लालाले संयुक्त रूपमा कम्पनीका प्रमुख कार्यकारी अधिकृत (सीईओ) उत्तरकुमार श्रेष्ठलाई उक्त अवार्ड प्रदान गरेका हुन् । यस अवार्डले कम्पनीलाई आगामी दिनमा अझ बढी परिष्कृत वित्तीय विवरण प्रकाशित गर्न हौसला मिलेको सीईओ श्रेष्ठले बताए । कम्पनीको परिष्कृत वार्षिक प्रतिवेदनले साउथ एशियन फेडेरेसन अफ एकाउन्टेन्ट्स (साफा)ले दक्षिण एसियाली स्तरमा आयोजना गर्ने उत्कृष्ट वार्षिक प्रतिवेदन अवार्डका लागि समेत छनोट भएको बताइएको छ ।
कम्पनीले हाल ९ दशमलव ४ मेगावाट तथा १२ मेगावाट क्षमताका दुईओटा जलविद्युत् केन्द्रमार्फत स्याङ्जा, पाल्पा, प्युठान तथा अर्घाखाँचीका करीब ६२ हजार घरधुरीलाई विद्युत् वितरण गर्दै आएको छ । हाल सञ्चालनमा रहेका ६० मेगावाटको खिम्ती प्रथम, ३० मेगावाटको न्यादी तथा ४ मेगावाटको खुदी जलविद्युत् आयोजनामा कम्पनीको लगानी गरेको बताइएको छ । त्यस्तै पूर्र्व निर्माणको चरणमा रहेका मस्र्याङ्दी बेसिनस्थित करीब ६०० मेगावाटको तीनओटा जलविद्युत् आयोजनामा समेत कम्पनीको छ ।
