प्रशोधित दुधको मूल्य बढेको छ । सरकारको स्वामित्वमा रहेको दुग्ध विकास संस्थान डीडीसीले दूधकाे उपभोक्ता मूल्य प्रतिलिटर नौ रुपैयाँ बढाएर ८५ रुपैयाँ निर्धारण गरेको हो ।डीडीसीको बुधबार बसेको सञ्चालक समितिको बैठकले दूधको मूल्य प्रति लिटर ७६ रुपैयाँबाट बढाएर प्रति लिटर ८५ रुपैयाँ निर्धारण गरेको हो । बढेको नौ रुपैयाँमा मध्ये प्रतिलिटर ६ रुपैयाँ ५२ पैसा किसानले पाउने र प्रतिलिटर २ रुपैयाँ ४८ पैसा उद्योगीले पाउने डीडीसीले जनाएको छ ।यस अघि मन्त्रिपरिषद्को बैठकले किसानका लागि दूधको न्यूनतम समर्थन मूल्य प्रतिलिटर ५६.०४ पैसा कायम गरेको थियो। किसानबाट खरिद गर्ने कच्चा दूधको मूल्य प्रतिलिटर ४९.५२ पैसा रहेकोमा सरकारले १३.१७ प्रतिशतले अर्थात् प्रतिलिटर ६.५२ रुपैयाँ मूल्य बढाएको थियो । दूधको मूल्य फ्याट र एसएनएफका आधारमा गरिएको थियो। हाल दूधको न्यूनतम फ्याट ४ प्रतिशत र एसएनएफ (धृतांशबाहेकको ठोस पदार्थ) ८ प्रतिशत कायम गरिएको छ। फ्याटको मूल्य १३.५ प्रतिशतले प्रतिलिटर २७.२४ रुपियाँ र एसएनएफको मूल्य १३ प्रतिशतले प्रतिलिटर २८.८ रुपियाँ गरी दूधको मूल्य ५६.०४ रुपियाँ कायम गरिएको छ। यो मूल्य सहकारीको कमिसनबाहेक हो। मन्त्रिपरिषद्को निर्णयपछि कृषि मन्त्रालयले उपभोक्ताको लागि प्रशोधित दूधको मूल्य निर्धारण गर्ने जिम्मेवारी डीडीसीलाई दिएको थियो।
