काठमाडौं । पछिल्लो समय लगानीकर्ताहरू शेयर बजारमा किन लगानी बढाउन सकिरहेका छैनन् भन्ने प्रश्न उब्जिएको छ । शेयर बजारका लागि सकारात्मक पक्षहरू हुँदाहुँदै पनि बजारप्रति लगानीकर्ता विश्वस्त नभएको देखिएको छ । सोही कारण बजार धेरै घट्न वा बढ्न सकेको छैन ।
१५ करोबार दिनको ट्रेण्डलाई हेर्दा बजार ९ कारोबार दिनमा परिसूचक १४३ दशमलव ३६ अंक घटेको छ भने ६ कारोबार दिनमा १३२ अंक बढेको छ । समग्रमा १५ कारोबार दिनमा १० अंक मात्रै बजार घटेको छ । यसले बजारमा खरीदकर्ताभन्दा बढी विक्रेता सक्रिय भएको देखाउँछ । बैंक तथा वित्तीय संस्थाले सार्वजनिक गरेको तेस्रो त्रैमासिक वित्तीय विवरणअनुसार कम्पनीहरूले नाफा कमाए पनि खराब कर्जाको अंश बढ्दो छ । यस कारण पनि लगानीकर्ता सक्रिय नभएको देखिन्छ ।
अझै पनि बजारमा तरलता अभाव भएको लगानीकर्ताहरू बताउँछन् । निक्षेपको ब्याजदर घटे पनि कर्जाको ब्याजदर महँगो छ । यस कारण पनि बजार प्रभावित भएको हो । अब शेयर बजारका केही नीतिगत विषयमा नियामक निकायले परिवर्तन गरेमा बजार सकारात्मक दिशामा जाने जानकारहरू बताउँछन् । माग र आपूर्तिले मूल्य निर्धारण गर्ने गर्दछ । बजार बढ्नका लागि लगानीकर्ताको मनोबल पनि सकारात्मक हुनु जरुरी छ ।
साताको चौथो कारोबार दिन बुधवार नेप्से परिसूचक शून्य दशमलव ७२ प्रतिशत अर्थात् १३ दशमलव ६८ अंक घटेर १ हजार ८९२ विन्दुमा कायम भएको छ । यस दिन २६४ धितोपत्रको २५ लाख ७१ हजार २०२ कित्ता २३ हजार ४२९ पटकमा रू. ८४ करोड ७ लाख बराबर शेयर कारोबार भएको छ ।
कारोबारमा आएका धितोपत्रमध्ये जनउत्थान सामुदायिक लघुवित्त वित्तीय संस्थाको शेयर मूल्य सबैभन्दा बढी ३ दशमलव २५ प्रतिशत बढेर रू. ९२१ पुगेको छ । त्यस्तै दोस्रोमा कुमारी इक्वीटी फण्डको इकाई २ दशमलव ५१ प्रतिशत बढेर रू. ८ दशमलव १८ पुगेको छ ।
बुधवार सबैभन्दा बढी सनराइज ब्लूचिप फण्डका इकाईधनीहरूले सर्वाधिक गुमाएका छन् । फण्डको इकाई मूल्य ९ दशमलव १२ प्रतिशत घटेको छ । फण्डको इकाई मूल्य रू. ७ दशमलव ७७ मा झरेको छ । त्यस्तै दोस्रोमा तारागाउँ रिजेन्सी होटलको शेयर मूल्य ७ दशमलव ११ प्रतिशत घटेर रू. ५०१ दशमलव ६० कायम भएको हो ।
यस दिन सर्वाधिक शेयर खरीदविक्रीको हिस्सा शिवम् सिमेन्ट्सले ओगटेको छ । कम्पनीको रू. ७ करोड १ लाख बराबर कारोबार भएको छ । त्यस्तै सर्वाधिक शेयर खरीदविक्री हुने दोस्रोमा तारागाउँ रिजेन्सी होटलको रू. ३ करोड ९० लाख बराबरको भएको हो ।
कारोबारमा आएका १३ ओटै समूहगत परिसूचक समग्र घटेका छन् । समूहगत परिसूचक घट्नेमा सबैभन्दा बढी लगानी समूहको परिसूचक १ दशमलव ३३ प्रतिशत घटेको हो । बुधवार सेन्सेटिभ इन्डेक्स शून्य दशमलव ५८ प्रतिशत र फ्लोट इन्डेक्स शून्य दशमलव ७५ प्रतिशत घटेको छ । त्यस्तै सेन्सेटिभ फ्लोट इन्डेक्स शून्य दशमलव ६४ प्रतिशत घटेको हो ।
