असोज १३, चितवन । आन्तरिक राजस्व कार्यालय भरतपुरको भदौ महीनाको राजस्व लक्ष्यभन्दा ४३ दशमलव ७४ प्रतिशतले वृद्धि भएको छ ।
भदौ महीनामा राजस्व विभागले ९३ करोड ६२ लाख ८१ हजार लक्ष्य दिइएकोमा उक्त महीनामा १ अर्ब ३३ करोड ६५ लाख ५३ हजार रुपैयाँ संकलन गरेको हो ।
संकलन भएको राजस्वमध्ये सबैभन्दा बढी अन्तशुल्क शीर्षकबाट राजस्व असुली भएको छ भने सबैभन्दा कम ब्याजकर शीर्षकमा २६ लाख ८२ हजार रुपैयाँ संकलन गरेको छ ।
जस अनुसार अन्तशुल्क शीर्षकमा ६३ करोड ६२ लाख ४० हजार लक्ष्य दिइएकोमा १ अर्ब ११ करोड ४८ लाख ७५ हजार रुपैयाँ संकलन गरेको हो । यस्तै ब्याज कर शीर्षकमा १ करोड ८० लाख ७४ हजारको लक्ष्य दिइएको थियो ।
शिक्षा सेवा कर र स्वास्थ्य सेवा कर शीर्षकमा भदौ महीनामा कुनैपनि राजस्व संकलन भएको छैन । उक्त महीनामा शिक्षा सेवा शुल्क शीर्षकमा विभागले २ लाख रुपैयाँ र स्वास्थ्य सेवा करमा ३ लाख ४२ हजार रुपैयाँ लक्ष्य दिएको थियो ।
यस्तै कार्यालयको आयकर र बहालकर तथा मूल्य अभिवृद्धि कर शीर्षकमा भने लक्ष्य अनुसार कर असुल्न हुन सकेको छैन । जस अनुसार आयकर शीर्षकमा १२ करोड १३ लाख ९ हजार रुपैयाँ लक्ष्य दिईएकोमा ११ करोड ९९ लाख ९४ हजार रुपैयाँ संकलन गरेको छ । यस्तै कार्यालयले बहालकर शीर्षकमा २३ लाख ८२ हजार रुपैयाँ कर संकलन गरेको छ । यो शीर्षकमा ३७ लाख रुपैयाँ लक्ष्य दिइएको थियो ।
कार्यालयले मूल्य अभिवृद्धि कर शीर्षकमा ९ करोड ६६ लाख ६० हजार कर असुल गरेको छ । यस शीर्षकमा १५ करोड ६५ लाख ४६ हजार रुपैयाँ लक्ष्य दिइएको थियो ।
कार्यालयका कर अधिकृत शुशील लम्सालले यो कार्यालयको मुख्य आम्दानीको स्रोतनै अन्तःशुल्क शीर्षक भएकोले यस शीर्षकमा बढी कर असुल हुने र अन्य शीर्षकमा कर संकलनमा उत्तारचढाव आउने बताए ।
‘हाम्रो सबै शीर्षकमध्ये ८० प्रतिशत भन्दा बढीसम्म अन्तःशुल्कबाट आउने करको हिस्सा छ, उनले भने, सबै शीर्षकमा हरेक महीना लक्ष्य अनुसार कर उठ्छ भन्ने हुंँदैन ।’ उनका अनुसार आयकर तिर्ने समय पनि नभएको, नियमित उठ्ने बहाल कर स्थानीय तहमा गएको र व्यवसायिक भवनको बहालकर पनि नियमित नउठ्ने गरेकोले शीर्षक अनुसारको लक्षित कर संकलन हुन नसकेको हो । ‘विभागले अघिल्ला वर्षहरुको ट्रेण्ड हेरेर हरेक शीर्षकको लक्ष्य दिएको हुन्छ । तर सोही अनुसार सबै शीर्षकमा लक्ष्यभन्दा बढी र उही अनुपातमा कर असुल भने हुँदैन ।’ लम्सालले भने ।
मूल्य अभिवृद्धि शीर्षकमा उठ्ने करमा आर्थिक गतिविधि अनुसार २ महिनापछि मात्र यसको असर देखिने उनको भनाइ छ । ‘कुल कलेक्सनमा हामी सन्तोेषजनक छौं, उनले भने, कोरोना कहर पनि कम भयो अब आगामी महीना कर कलेक्सनमा थप सुधार हुने आशा गर्न सकिन्छ ।
विभागले यस कार्यालयलाई चालू आर्थिक वर्षका लागि २० अर्ब ६५ करोड २५ लाख ७ हजार रुपैयाँ लक्ष्य दिएको छ ।