चितवन । नवलपुरको गैंडाकोटमा रहेको अक्सफोर्ड कलेज अफ इन्जिनियरिङ एण्ड म्यानेजमेन्टले ‘पिक अफ सक्सेस–२०२३’ अवार्ड पाएको छ ।
विश्भरका उत्कृष्ट र सफल कम्पनीहरूलाई अवार्ड दिँदै आएको अमेरिकन कम्पनी ‘द कन्फिडेरेसन अफ बिजनेस’ले काजगस्थानको राजधानी आस्थानामा आयोजित कार्यक्रममा कलेजलाई उक्त अवार्डबाट सम्मानित गरेको हो । कार्यक्रममा सो अवार्ड कलेजका प्राचार्य हरि भण्डारीलाई हस्तान्तरण गरियो ।
सो समारोहमा ५० देशका विभिन्न व्यावसायिक संघ संगठनका प्रमुख एवं प्रतिनिधि उपस्थित थिए ।
प्राचार्य र प्राध्यापकहरूलाई पनि अवार्ड
समारोहमा कलेजका प्राचार्य भण्डारी वर्ल्ड लिडर बिजनेश पर्शन र वर्ल्ड बिजनेश लिडर गरी दुईओटा अवार्डबाट सम्मानित भएका छन् । यस्तै, कलेजका प्राध्यापकहरू तिलकराम पन्थी, भीमप्रसाद भण्डारी, दीपेन्द्र सिलवाल, प्रेमलाल शर्मालाई समेत अवार्ड प्रदान गरिएको अक्सफोर्ड कलेजले जानकारी दिएको छ । उनीहरूलाई अब्बल नतिजा निकाल्न मेहनत गरेको भन्दै अवार्डले सम्मानित गरिएको हो ।
‘कलेज र कलेजका प्राध्यापकहरूलाई दिइएको सम्मानले अक्सफोर्ड कलेज अफ इन्जिनियरिङ एण्ड म्यानेजमेन्ट उत्कृष्ट क्षमताको प्रयोग गरी चुस्त ब्यवस्थापन, सफल नेतृत्व र शैक्षिक गुणस्तर कायम गर्न सफल र सक्षम छ भन्ने कुरा प्रमाणित भएको छ,’ प्रिन्सिपल भण्डारीले भने ।
२०५७ सालमा स्थापना भएको यो कलेजमा बीसीए, इन्जिनियरिङ, होटेल म्यानेजमेन्ट, कम्युटर विज्ञान, बीबीए लगायतका संकायको पठनपाठन हुँदै आएको छ ।
