जेठ २, काठमाडौं । जेठ महीनाको पहिलो कारोबार दिन आइतवार नेपालको शेयर बजार हालसम्मकै उच्च विन्दुमा पुगेको छ ।
यो दिन नेप्से परिसूचक २ हजार ७३८ दशमलव ३५ विन्दुमा पुगेको हो । यस अघि वैशाख २ गते नेप्सेले २ हजार ७३५ दशमलव ४६ विन्दु कायम गरेको थियो ।
त्यसपछिको उच्च विन्दु भने आइतवार कायम भएको हो । यसदिन नेप्से परिसूचक २ दशमलव शून्य २ प्रतिशत अर्थात् ५४ दशमलव २६ अंक बढेको हो । यसदिन २ हजार ६९३ दशमलव ९१ विन्दुदेखि खुलेको बजार निरन्तर बढेर बन्द भएको छ ।
नेप्सेले हालसम्मकै उच्च विन्दु कायम गरेको दिन रू. १० अर्ब ४० करोड ३८ लाख ७९ हजार बराबरको शेयर कारोबार भएको छ । २१४ ओटा कम्पनीको १ लाख १३ हजार ६९ पटकको व्यापारमा उक्त रकम बराबरको २ करोड १३ लाख २८ हजार ८८२ कित्ता शेयर कारोबार भएको हो । नेप्सेमा तीन महिनापछि रू. १० अर्ब बराबरको शेयर कारोबार भएको हो ।
यसअघि गत फागुन ४ गते नेप्सेमा रू. १० अर्ब ३ करोडभन्दा बढीको शेयर कारोबार भएको थियो । नेप्सेमा हालसम्मकै उच्च कारोबार रकम रू. १० अर्ब ६१ करोड ९१ लाख ६३ हजार रहेको छ । हालसम्मकै उच्च रकमको कारोबार भने गत माघ २६ गते भएको थियो ।
कुल कारोबार रकममा यो दिन सर्वाधिक हिस्सा नेपाल पुनर्बीमा कम्पनीले ओगटेको छ । उक्त कम्पनीको रू. ८५ करोड २० लाख ३ हजार बराबरको शेयर कारोबार भएको हो ।
सर्वाधिक रकमको कारोबार भएको कम्पनीको शेयरमूल्य पनि एकै दिन प्रतिकित्ता रू. ६२ ले बढेर अन्तिम मूल्य रू. १ हजार ६४३ पुगेको छ । यो दिन नेपाल पुनर्बीमा कम्पनीको शेयरमूल्य न्यूनतम रू. १ हजार ५९५ देखि रू. १ हजार ६६० सम्म पुगेको थियो ।
आइतवार दोहोरो उच्च अंकले बढेको बजारमा आठ ओटा कम्पनीको शेयरमूल्यमा उच्च वृद्धि भएको छ । यो दिन रू रू जलविद्युत् परियोजनाको शेयरमूल्य १० प्रतिशतले र अन्य सात ओटा कम्पनीको ९ प्रतिशतभन्दा बढीले बृद्धि भएको हो ।
रू रू जलविद्युत् परियोजनाको प्रतिकित्ता रू. ८० ले बढेर यो दिन अन्तिम मूल्य रू. ८८० कायम भएको छ । त्यस्तै शिखर इन्स्योरेन्सको शेयरमूल्य ९ दशमलव ९७ प्रतिशत, समता घरेलु लघुवित्तको ९ दशमलव ९५ प्रतिशत , सप्तकोशी डेभलपमेण्ट बैंकको ९ दशमलव ९० प्रतिशत, प्रोग्रसिभ फाइनान्सको ९ दशमलव ९० प्रतिशत शेयरमूल्य बढेको छ ।
त्यसैगरी बरुण हाइड्रोको ९ दशमलव ८३ प्रतिशत , आइएमई जनरल इन्स्योरेन्सको ९ दशमलव ७६ प्रतिशत र विशाल बजार कम्पनीको ९ दशमलव ३७ प्रतिशत शेयरमूल्य बढेको छ ।
यो दिन शिखर इन्स्योरेन्सको प्रतिकित्ता रू. १९३ ले बढेर अन्तिम मूल्य रू. २ हजार १२८, समता घरेलु लघुवित्तको प्रतिकित्ता रू. ११६ ले बढेर अन्तिम मूल्य रू. १ हजार २८२, सप्तकोशी डेभलपमेण्ट बैंकको प्रतिकित्ता रू. २० ले बढेर अन्तिम मूल्य रू. २२२, प्रोग्रेसिभ फाइनान्सको प्रतिकित्ता रू. २० ले बढेर अन्तिम मूल्य रू. २२२, बरुण हाइड्रोको प्रतिकित्ता रू. २९ ले बढेर अन्तिम मूल्य रू. ३२४ , आइएमई जनरल इन्स्योरेन्सको प्रतिकित्ता रू. ११२ ले बढेर अन्तिम मूल्य रू. १ हजार २६० र विशाल बजार कम्पनीको प्रतिकित्ता रू. ५५५ ले बढेर अन्तिम मूल्य रू. ६ हजार ४७९ कायम भएको छ ।
यस दिन कारोबारमा आएका सबै समूहको परिसूचक बढेको छ । सर्वाधिक निर्जिवन बीमा समूहको ४ दशमलव २८ प्रतिशतले परिसूचक बढेको हो ।
त्यस्तै, बैंकिङ्गको १ दशमलव ५४ प्रतिशत, व्यापारिकको १ दशमलव ३ प्रतिशत, होटल्स तथा पर्यटनको १ दशमलव ११ प्रतिशत, विकास बैंकको ३ दशमलव ८७ प्रतिशत, जलविद्युतको १ दशमलव १५ प्रतिशत, वित्तको १ दशमलव १९ प्रतिशत, उत्पादन तथा प्रशोधनको १ दशमलव शून्य ६ प्रतिशत, अन्यको २ दशमलव १४ प्रतिशत, लघुवित्तको १ दशमलव ८९ प्रतिशत, जीवन बीमाको ३ दशमलव शून्य ४ प्रतिशत, म्युचुअल फण्डको शून्य दशमलव २८ प्रतिशत र लगानी समूहको २ दशमलव शून्य २ प्रतिशत परिसूचक बढेको छ ।
