काठमाडौं । कामना सेवा विकास बैंकले त्रिभुवन विश्वविद्यालय (त्रिवि), व्यवस्थापन संकाय, व्यवस्थापन केन्द्रीय विभागसँग दक्ष जनशक्ति उत्पादन तथा आपूर्तिका लागि सहयोग आदानप्रदान गर्नेसम्बन्धी सम्झौता गरेको छ ।
आइतवार भएको सम्झौतामा विभागले वित्तीय साक्षरता कार्यक्रम लगायत बैंकका विभिन्न कार्यक्रममा विद्यार्थी स्वयंसेवक उपलब्ध गराउने उल्लेख छ । साथै, विभागका कर्मचारी, व्यवस्थापन सदस्य तथा विद्यार्थीलाई बैंकको वित्तीय सेवा सुविधा प्रयोग गर्न प्रोत्साहन गरिने सम्झौतामा उल्लेख छ ।
उक्त सम्झौतापश्चात् बैंकले पहिचान गरेका क्षेत्रमा विभागले अनुसन्धान समेत गर्न सहमति भएको छ । बैंकले विभागका विद्यार्थीलाई इन्टर्नसिप कार्यक्रम र बैंकमा रोजगारको अवसर समेत प्रदान गर्ने बताइएको । बैंकले प्रत्येक वर्ष विभागले सिफारिश गरेका विद्यार्थीमध्ये दुई जनालाई शोधकार्य छात्रवृत्ति उपलब्ध गराइने बताइएको छ ।
