नेपाल उद्योग परिसंघले अर्थमन्त्री प्रकाशशरण महतलाई भेटी आगामी ५ वर्षलाई लगानी वर्ष घोषणा गर्न सुझाव दिएको छ । मुलुकलाई आर्थिक रूपान्तरण गर्न ठूलो परिमाणमा लगानी चाहिएको सन्दर्भमा केकस्ता उपाय अपनाउँदा उपयुक्त हुन्छ भनेर विभिन्न सुझाव दिनु सही नै हो ।
त्यसमाथि पनि नेपाल उद्योग वाणिज्य महासंघ, नेपाल उद्योग परिसंघ, चेम्बर अफ कमर्सजस्ता निजीक्षेत्रका प्रतिनिधिमूलक संस्थाले दिने सुझावले विशेष महत्व राख्ने गर्छ । यद्यपि सरकारले यस्ता सुझावलाई निकै कम महत्व दिने गरेको छ । तर, अहिले परिसंघले ५ वर्षलाई लगानी वर्ष घोषणा गर्ने जुन सुझाव दिएको छ त्यो भने खासै अर्थपूर्ण देखिँदैन किनकि अहिले मुलुकलाई हरेक वर्ष थप लगानीको आवश्यकता छ ।
कुनै १ वर्षलाई कुनै एक क्षेत्रमा विशेष प्राथमिकता दिन विशेष वर्ष घोषणा गरी अभियान सञ्चालन गर्ने गरिएको छ । नेपालमा यस्ता कार्यक्रमको प्रभावकारिता भने उत्साहजनक देखिएको छैन । वार्षिक कार्यक्रमकै कार्यान्वयन फितलो भएको अवस्थामा यस्ता कार्यक्रम प्रभावकारी नहुनु सामान्य नै हो । लगानीका लागि कुनै अवधि तोकेर कार्यक्रम ल्याउनु जरुरी छैन । लगानीमैत्री वातावरण बनाएर धेरैभन्दा धेरैलाई लगानी गर्न उत्प्रेरित गर्नु आवश्यक छ ।
विकसित मुलुकहरूले समेत लगानी बढाउन अनेक कार्यक्रम ल्याइरहेका हुन्छन् । त्यसका लागि कुनै अवधिको विशेष अभियान चलाएको पाइँदैन । यस्तो अभियान चलाएर लगानी बढी भित्रिने पनि होइन । अतः लगानीलाई प्रोत्साहन गर्न हरेक वर्ष उत्तिकै सक्रिय र सचेत हुन जरुरी देखिन्छ ।
हो, कुनै खास क्षेत्रमा मात्रै लगानीका लागि अभियान सञ्चालन गर्न सकिन्छ । जस्तै ५ वर्ष जलविद्युत् क्षेत्रलाई उच्च प्राथमिकता दिन सकिन्छ । अथवा ५ वर्ष खास खास उद्योगलाई उच्च प्राथमिकता राखेर प्रोत्साहित गर्न सकिन्छ । यस्तो विशेष अभियान प्रभावकारी बन्न सक्छ । तर, भ्रमण वर्ष भनेर विशेष अभियान चलाउँदा पर्यटक बढेजस्तो लगानी वर्ष मनाउनु व्यावहारिक देखिँदैन ।
परिसंघले कसरी लगानी बढी भित्याउन सकिन्छ भनेर चासो राख्नु र सुझाव दिनु उपयुक्त हो । उसले उठाएका सबै विषय जायज छन् तर ५ वर्ष लगानी वर्ष भनेर मनाउनुचाहिँ परिणाममुखी हुने सम्भावना कमै देखिन्छ ।
