काठमाडौं । नाडा अटोमोबाइल्स एशोसिएशन अफ नेपालको प्रतिनिधिमण्डलले अर्थमन्त्री डा. प्रकाशशरण महतसँग भेट गरेको छ । नाडाका अध्यक्ष धु्रव थापाको नेतृत्वमा गएको प्रतिनिधिमण्डलले अर्थमन्त्री महतसँग भेट गरी अटोमोबाइल क्षेत्रका समसामयिक समस्याका विषयमा छलफल गरेको थियो ।
छलफलको क्रममा अध्यक्ष थापाले सवारीसाधनलाई सरकारले विलासिताको वस्तुमा वर्गीकरण गरी सोहीअनुरूप नीतिको निर्माण भइरहेकाले यसमा सुधार गर्न आग्रह गरे । अटो लोन/हायर पर्चेज कर्जामा जोखिम भारलाई १५० प्रतिशतबाट घटाएर ७५ प्रतिशत कायम गर्नुपर्ने उनको भनाइ थियो । आम सर्वसाधारणले प्रयोग गर्ने भाडाका सवारीसाधनमा लाग्ने भन्सार तथा अन्त:शुल्क महशुल घटाउन समेत उनले आग्रह गरे । अटोमोबाइल स्पेयर पार्ट्सको चोरीपैठारी बढेकाले त्यसलाई नियन्त्रण गरी राजस्व बढाउनुपर्नेमा उनले जोड दिए ।
छलफलमा अर्थमन्त्री महतले आफूले धेरै अप्ठ्यारो परिस्थितिमा जिम्मेवारी सम्हालेको भन्दै अटोमोबाइल व्यवसायीको समस्याको सम्बोधनका लागि प्रयास गर्ने बताए । ‘तपाईंहरू समस्यालाई समेटेर आवश्यक सुझाव दिनुस्, राष्ट्र बैंकसँग छलफल गरेर बजेटमा समावेश गर्ने प्रयास गरिनेछ,’ उनले भने ।
अर्थमन्त्री महतले विद्युतीय सवारीसाधनको उत्पादन र विक्रीमा यथोचित ध्यान दिन व्यवसायीलाई आग्रह गरेका थिए । जवाफमा नाडा अध्यक्ष थापाले विद्युतीय सवारीसाधनको प्रयोगलाई प्रोत्साहन गर्न त्यसमा लाग्ने भन्सार तथा अन्त:शुल्क महशुलमा थप छूट दिनुपर्ने सुझाएका थिए ।
