काठमाडौं । सरकारले आन्तरिक हवाई उडानका यात्रुको एन्टिजेन परीक्षण अनिवार्य गरे पनि वायुसेवा सञ्चालक संघले भने कोभिडविरुद्धको खोप लगाएको कार्डबाट नै हवाई यात्रा गर्न सकिने निर्णय गरेको छ । वायुसेवा सञ्चालक संघले हवाई यात्रुहरूले विमानस्थल प्रवेश गर्दा कोभिड–१९ विरुद्धको खोप लगाएको कार्ड देखाएर पनि यात्रा गर्न सकिने निर्णय गरेको हो ।
संघको बुधवार बसेको कार्यसमिति बैठकले कार्ड सीधै कार्ड बोकेको नभए पनि मोबाइलमा फोटो खिचेको भए त्यो देखाएर पनि यात्रा गर्न सकिने निर्णय गरेको छ । पुस ३० गते मन्त्रिपरिषद्को बैठकले वायुसेवा कम्पनीहरूले नै यात्रुको एन्टिजेन परीक्षण गरेर कोभिड नेगेटिभ आएमात्रै यात्रा गराउन पाउने निर्णय गरेको थियो । माघ ८ गतेदेखि एन्टिजेन परीक्षण गर्ने मन्त्रिपरिषद्को निर्णय भए पनि शनिवार नआउँदै संघले बुधवार बैठक बसेर कार्डकै आधारमा हवाई यात्रा गर्न सकिने निर्णय गरेको हो ।
संघले सूचना जारी गरेर हवाई यात्रमा कोभिडविरुद्धको कार्डलाई अनिवार्य गरेको छ । आन्तरिक हवाई उडानमा स्वास्थ्य सुरक्षासम्बन्धी मापदण्ड पालना गर्दै नयाँ भेरियन्ट ओमिक्रोनको रोकथाम तथा नियन्त्रणका लागि अन्य आवश्यक विषयहरू पनि लागू हुने संघले उल्लेख गरेको छ । संघले एयरलाइन्स कम्पनीहरूले पालना गर्नुपर्ने नियमहरू पनि तोकेको छ । संघका अनुसार एयरलाइन्स कम्पनीहरूले हवाई जहाजभित्र स्यानिटाइजरको व्यवस्था गर्नुपर्ने, प्रत्येक उडानपछि हवाई जहाज र ब्यागेज निस्संक्रमित गर्नुपर्ने, चेक–इन बोडिङ क्लेम गर्ने स्थान तथा प्रतीक्षालयमा भीडभाड हुन नदिने र जनस्वास्थ्यका मापदण्डहरू लागू गर्नुपर्नेछ । पछिल्लो समय कोभिडको नयाँ भेरियन्ट ओमिक्रोन संक्रमण अत्यधिक देखिन थालेपछि यात्रामा स्वास्थ्य मापदण्डहरू पालनामा कडाइ गरिएको छ ।
केही दिनअघि निजीक्षेत्रको वायुसेवा प्रदायक कम्पनी बुद्ध एयरले १ हजार ८९५ जनामा गरेको सर्वेक्षणमा हवाई यात्रुमध्ये ९५ प्रतिशत यात्रुले कोभिडविरुद्धको खोप लगाएका थिए ।
