.jpg)
फागुन २, काठमाडौं । नेशनल हाइड्रोपावर कम्पनी लिमिटेडले शेयरधनीहरुलाई पहिलो पटक १९ दशमलव ५ प्रतिशत लाभांश दिने भएको छ ।
कम्पनीले सोमवार वार्षिक साधारण सभाको सूचना जारी गर्दै उक्त लाभांश प्रस्ताव सार्वजनिक गरेको हो । कम्पनीको फागुन १ गतेको सञ्चालन समितिको बैठकले हाल कायम चुक्तापूँजी रू. १ अर्ब ३८ करोड ५१ लाख ८६ हजारको आधारमा १८ दशमलव ५३ प्रतिशत बोनस शेयर र कर प्रयोजनका लागि शून्य दशमलव ९८ प्रतिशत नगद लाभांश वितरण गर्ने निर्णय गरेको हो ।
कम्पनीले हालसम्म शेयरधनीहरुलाई लाभांश वितरण गरेको थिएन । यस वर्ष कम्पनीले बोनस वितरणपछि कायम चुक्तापूँजीको आधारमा हकप्रद शेयर समेत निष्कासन गर्ने प्रस्ताव गरेको छ । उक्त प्रस्ताव पारितका लागि कम्पनीले फागुन ३० गते २५औं वार्षिक साधारण सभा बोलाएको छ । सभा बिहान ११ बजे भर्चुअल माध्यमबाट आयोजना हुनेछ ।
सभाले लाभांश र हकप्रद शेयर निष्कासनको प्रस्ताव सहित गत आर्थिक वर्ष ०७७/७८ सम्मको वार्षिक प्रतिवेदन सहितका वित्तीय विवरणहरु पारित गर्नुका साथै सुनकोशी हाइड्रोपावर कम्पनी लिमिटेडलाई प्राप्ति गर्ने प्रस्ताव समेत पारित गर्नेछ ।
कम्पनीले सुनकोशी हाइड्रोपावर कम्पनीलाई १ बराबर शून्य दशमलव २५ को अनुपातमा शेयर आदानप्रदान गर्ने गरी प्राप्ति गर्न लागेको हो । सभाले चालू आवको लागि लेखापरीक्षक नियुक्ती र निजको पारिश्रमिक निर्धारणसँगै सात जना सञ्चालकहरुको निर्वाचन समेत गर्ने कार्यक्रम रहेको छ । साधारण सभा र लाभांश प्रयोजनका लागि कम्पनीले फागुन १३ गते (एक दिन) बुक क्लोज गर्ने भएको छ । बुक क्लोजको आधारमा फागुन १२ गतेसम्म कायम शेयरधनीहरुले मात्र लाभांश प्राप्त गर्न र सभामा भाग लिन सक्नेछन् ।
चालू आर्थिक वर्षको दोस्रो त्रैमाससम्मको वित्तीय विवरण अनुसार गत वर्ष रू. ३२ करोड ४७ लाखभन्दा बढी ऋणात्मक रहेको जगेडा कोष रकम यस वर्ष सुधारिएर रू. २६ करोड ८ लाख कायम भएको छ । यस वर्ष कम्पनीले रू. ८५ लाख ४९ हजार खुद नाफा गरेको छ ।
कम्पनीको खुद नाफा यस वर्ष ३९ दशमलव १८ प्रतिशत कम भएको हो । गत वर्ष यस अवधिसम्म कम्पनीले रू. १ करोड ४० लाखभन्दा बढी खुद नाफा गरेको थियो । हाल कम्पनीको चुक्तापूँजी रू. १ अर्ब ३८ करोडभन्दा बढी छ ।
