सरकारले कोरोना भाइरस (कोभिड–१९) सङ्क्रमण रोकथाम तथा नियन्त्रणका लागि जारी गरेको बन्दाबन्दी (लकडाउन) को औपचारिक अन्त्य गरेको छ । सङ्क्रमण नियन्त्रणमा रहेको भए पनि जोखिम कायमै रहेकाले औपचारिक बन्दाबन्दी अन्त्य गरिए पनि कोभिड–१९ रोकथाम, नियन्त्रण र उपचारसम्बन्धी व्यवस्था यथावत् राखिएको छ । चैत ११ गतेदेखि गरिएको बन्दाबन्दी पछिल्लोपटक साउन ६ गते मध्यरातसम्मका लागि जारी थियो । चार महिना लामो बन्दाबन्दी अन्त्यको घोषणासँगै सर्वसाधारणले राहत महसुस गरेका छन् । लामो निष्क्रिय जीवनबाट नागरिकहरू पूर्ववत् अवस्थामा फर्कने सुखद वातावरण आफैँमा हर्षोल्लास भएको छ । उद्योग, व्यवसाय सञ्चालन नहुँदा सार्वजनिक जीवन मात्र होइन, मुलुकको आर्थिक गतिविधिमा सङ्कुचन र राजस्व उठ्तीमा कमी आएको छ । विश्वव्यापी प्रभावजस्तै नेपालमा पनि कोरोनाले हरेक क्षेत्रलाई असहज बनाउन पुग्यो । सरकारले अन्य देशको अनुभव तथा नेपालमा सङ्क्रमणको विद्यमान अवस्था मूल्याङ्कन गरी बन्दाबन्दी अन्त्य गरेकाले अर्थतन्त्र र नागरिक जीवनमा यो निर्णयले सकारात्मक परिणाम दिने अपेक्षा गर्न सकिनेछ ।
