काठमाडौं । भारतका विदेश सचिव विनय क्वात्राले सोमवारदेखि नेपालको भ्रमण गर्ने भएका छन् । नेपालका परराष्ट्र सचिव भरतराज पौड्यालको निमन्त्रणमा क्वात्राले दुईदिने नेपाल भ्रमण गर्न लागेका हुन् । उनको नेपाल भम्रण भारतको विदेश सचिवको कार्यभार सम्हालेपछि पहिलो पटक हुन लागेको हो । यसअघि उनी नेपालका लागि भारतीय राजदूत थिए ।
दुई देशबीचको नियमित उच्चस्तरीय भेटवार्ताको परम्परा र भारतको ‘छिमेकी पहिलो’ नीति अन्तर्गत भारतले नेपालसँगको सम्बन्धलाई दिएको प्राथमिकता अनुरूप भ्रमण हुन लागेको भारतीय दूतावासले जानकारी दिएको छ । सो क्रममा विदेश सचिवद्वय पौड्याल र क्वात्राले दुई देशबीचको बहुआयामिक सहकार्यका विविध पक्षबारे छलफल हुने बताइएको छ । भ्रमणले दुई देशबीचको सम्बन्ध थप प्रगाढ बढाउने अवसर प्रदान गर्ने भारतीय दूतावासको भनाइ छ ।
