काठमाडौं (अस) । इजरायल सरकारले त्यहाँको निर्माण क्षेत्रमा समेत नेपाली श्रमिक लैजाने भएको छ । नेपाल र इजरायल सरकारले नेपाली नागरिकलाई इजरायलमा निर्माण क्षेत्रमा काम गर्न पठाउने द्विपक्षीय सम्झौताको तयारीका लागि संयुक्त कार्यदल गठन गर्ने निर्णय गरेका छन् । उक्त निर्णयसँगै इजरायलको निर्माण क्षेत्रमा नेपालीका लागि रोजगारीको ढोका खुल्ने भएको हो ।
बुधवार दिउँसो परराष्ट्रमन्त्री डा. नारायण खड्का र नेपालका लागि इजरायली राजदूत हानान गोडर–गोल्डबर्गरबीच भेटवार्तामा श्रम सम्झौताको तयारीका लागि कार्यदल गठन गर्ने निर्णय भएको इजरायली दूतावासद्वारा जारी गरिएको विज्ञप्तिमा उल्लेख छ ।
दुवै पक्षले सुसारे/सेवा सुश्रुवा क्षेत्रमा सहायक कामदार छनोटका सम्बन्धमा आवश्यक सबै प्रक्रिया पूरा भएकोमा सन्तोष व्यक्त गरेका छन् । यस क्षेत्रका ९९ जना कामदारको पहिलो टोली बुधवार नै इजरायल प्रस्थान गरेको घोषणा गरिएको छ । सुसारे/सेवा सुश्रुवा क्षेत्रका लागि छनोट गरिएका एक हजारभन्दा बढी कामदार आगामी हप्ताहरूमा क्रमशः इजरायल प्रस्थान गर्ने बताइएको छ ।
