विराटनगर (अस) । उद्योग, वाणिज्य तथा आपूर्ति मन्त्रालय, नेपाल उद्योग वाणिज्य महासंघ र नेपाल उद्योग वाणिज्य महासंघ प्रदेश १ को साझेदारीमा विश्व व्यापार संगठनको व्यापार सहजीकरण सम्झौताबारे प्रशिक्षण सञ्चालन भएको छ ।
शनिवार बिहान उद्योग, वाणिज्य तथा आपूर्तिमन्त्री दिलेन्द्रप्रसाद बडूले कार्यक्रमको उद्घाटन गरेका थिए । सन् २०१७ फेब्रुअरीमा लागू भएको संगठनको व्यापार सहजीकरण सम्झौतामा प्रशासनिक बाधा हटाउँदै व्यापारमा अझ धेरै दक्षता ल्याउने उल्लेख छ । सिमानामा अनावश्यक अनुमगन, धेरै कागजाती र डेटा प्रक्रिया, म्यानुअल प्रक्रिया, सीमा निकायबीच समन्वयको अभाव, जटिल र अप्रभावकारी नियम र प्रक्रिया जस्ता समस्याले व्यापारका सामान ढुवानीमा ढिलाइ हुनुको साथै लागत बढाउने भएकोले यसलाई हटाउन सम्झौतामार्फत पहल गरिएको छ । व्यापार सहजीकरण सम्झौता कार्यान्वयनबाट व्यापारलाई अन्तरराष्ट्रियकरण गर्ने बाटो खुल्ने बताइएको छ । सम्झौताबाट नयाँ प्रक्रिया र आवश्यकताले कसरी आफ्नो व्यापारको प्राथमिकतालाई पूरक बनाउँछ भन्नेमा राम्रो ज्ञान प्राप्त भई मझौला उद्योगले विशेष लाभ उठाउन सक्ने बताइएको छ ।
कार्यक्रममा मन्त्री बडूले यस्ता प्रशिक्षणले व्यापार, व्यवसायमा रहेका समस्याको पहिचान र समाधानमा सहयोग पुग्ने बताए । प्रदेश १ मुख्यमन्त्रीका आर्थिक सल्लाहकार एवं नेपाल उद्योग वाणिज्य महासंघका केन्द्रीय सदस्य राजेन्द्र राउतले विराटनगर प्रदेशकै मुख्य व्यापारिक केन्द्र भएकोले प्रशिक्षण कार्यक्रमले उद्योगी, व्यवसायी लाभान्वित हुने बताए ।
