काठमाडौं । बैंकहरूले समग्रमा नाफामूलक वित्तीय विवरण सार्वजनिक गर्दा पनि शेयर बजार घट्ने क्रम रोकिएको छैन । आज नेप्से १ दशलमव ८३ प्रतिशत घटेर २ हजार ५१ दशमलव ४७ विन्दुमा झरेको छ ।
मौद्रिक नीतिमा शेयर धितो कर्जा, रियल स्टेट कर्जा तथा हायर पर्चेज कर्जाका विद्यमान जोखिम भारसम्बन्धी व्यवस्था पुनरावलोकन गरिने व्यवस्था उल्लेख भएपछि बढेको बजार भोलिपल्टदेखि घट्न थालेको हो । मौद्रिक नीति सार्वजनिक भएको दिन (यही साउन ७ गते) ६३ अंकले बढेको बजार त्यसयता १९३ अंकले घटिसकेको छ ।
मौद्रिक नीति सार्वजनिक पछिको पत्रकार सम्मलेनमा गभर्नर महाप्रसाद अधिकारीले शेयर धितो कर्जा प्रवाह गर्दा ५० लाख रुपैयाँसम्मको कर्जामा जोखिम भार सय प्रतिशत रहने व्यवस्था परिमार्जन गरिएको जानकारी दिएपछि बजार ओरालो लागेको हो ।
आज बैंकहरूको वित्तीय विवरणले लगानीकर्तालाई तान्न नसके पनि आकर्षक नाफा कमाउने केही बैंकको शेयर मूल्य भने बढेको छ ।
आइतवार बजार निरन्तर ओरालो लाग्दा लगानीकर्ता प्यानिक बनेका छन् । सोही कारण पनि कारोबार रकम बढेको देखिन्छ । अघिल्लो कारोबार दिन रू. १ अर्ब ७८ करोड बराबरको शेयर कारोबार भएकोमा आइतवार भने रू. २ अर्ब ६८ करोड बराबरको भएको हो ।
यस दिन सेन्सेटिभ इन्डेक्स १ दशमलव ८८ प्रतिशत, फ्लोट इन्डेक्स १ दशमलव ८९ प्रतिशत र सेन्सेटिभ फ्लोट इन्डेक्स १ दशमलव ९३ प्रतिशत घटेको छ । आइतवार २६५ धितोपत्रको ८० लाख ७ हजार ३६१ कित्ता शेयर ६१ हजार ९१७ पटकमा रू. २ अर्ब ६८ करोड बराबरको कारोबार भएको छ ।
कारोबारमा आएका धितोपत्रमध्ये आइएमई लाइफ इन्स्योरेन्स कम्पनीको शेयर मूल्य सबैभन्दा बढी ९ दशमलव ९९ प्रतिशत वृद्धि भएको छ । कम्पनीको शेयर मूल्य प्रतिकित्ता रू. ५८२ दशमलव ४० पुगेको हो ।
शेयर मूल्य सर्वाधिक बढ्ने कम्पनीको सूचीमा दोस्रोमा नेपाल रिपब्लिक मिडिया लिमिटेड छ । कम्पनीको शेयर मूल्य ९ दशमलव ९८ प्रतिशत बढेर रू. २७५ दशमलव ४० पुगेको छ । यी दुवै कम्पनीको शेयर धितोपत्रको दोस्रो बजारमा आजदेखि आएको हो । सोही कारण पनि यी कम्पनीका शेयरमा खरीदकर्ता आकर्षित भएका हुन् ।
आइतवार सबैभन्दा बढी प्रोग्रेशिभ फाइनान्स कम्पनीका शेयरधनीले गुमाएका छन् । यस कम्पनीको शेयर मूल्य ९ दशमलव ५९ प्रतिशत घटेको छ । शेयर मूल्य प्रतिकित्ता रू. ३३० मा झरेको छ । शेयर मूल्य सर्वाधिक घट्ने कम्पनीको सूचीमा दोस्रोमा अभियान लघुवित्त वित्तीय संस्था छ । कम्पनीको शेयर मूल्य ८ दशमलव ०४ प्रतिशत घटेर रू. ७१९ दशमलव १० कायम भएको छ ।
सर्वाधिक शेयर खरीदविक्रीको हिस्सा सानिमा बैंकले ओगटेको छ । यस कम्पनीको रू. १२ करोड ६९ लाख बराबरको शेयर कारोबार भएको छ । यससँगै कम्पनीको शेयर मूल्य प्रतिकित्ता रू. २९७ कायम भएको छ । त्यस्तै सर्वाधिक शेयर खरीदविक्री हुने कम्पनीको सूचीमा दोस्रोमा एभरेष्ट बैंक छ । कम्पनीको रू. १२ करोड २१ लाख बराबरको शेयर खरीदविक्री भएको हो ।
यस दिन कारोबारमा आएका १३ ओटै समूहगत परिसूचक सबै घटेका छन् । सबैभन्दा बढी होटल तथा पर्यटन समूहको परिसूचक ३ दशमलव ५९ प्रतिशत घटेको छ ।
