विद्युत प्राधिकरणको भरतपुर वितरण केन्द्रको बक्यौता साढे ४३ करोड, 'नतिर्नेलाई कालोसूचीमा'

चितवन । नेपाल विद्युत प्राधिकरण भरतपुर वितरण केन्द्रले साढे ४३ करोड रुपैयाँभन्दा बढी विद्युत महसुल बक्यौता रहेको जनाएको छ । प्राधिकरणको भरतपुर वितरण केन्द्रका अनुसार विद्युत बक्यौताबापतको ४३ करोड ५५ लाख ७८ हजार रुपैयाँ महसुल उठ्न बाँकी छ ।  वितरण केन्द्रका अनुसार ६० दिनभन्दा बढी समय नाघेका ग्राहकको मात्रै ३५ करोड ४१ लाख ५३ हजार १६५ रुपैयाँ विद्युत महसुल उठ्न बाँकी छ । दुई वर्षभन्दा माथिको १० करोड ५६ लाख ४४ हजार रुपैयाँ बक्यौता रकम उठाउन बाँकी रहेको तथ्यांक छ ।  दुई महिनादेखि ६ महीनासम्मको चार करोड ९८ लाख २० हजार, ६ महीनादेखि १२ महीनासम्मको दुई करोड आठ लाख २८ हजार, १२ महीनादेखि २४ महीनासम्मको तीन करोड २९ लाख, ५८ हजार रुपैयाँ उठ्न बाँकी रहेको विद्युत प्राधिकरण भरतपुर वितरण केन्द्रका प्रमुख इन्जिनियर राजेन्द्र पौडेलले जानकारी दिए । कोरोना भाइरसको महामारीको चपेटामा परेका उद्योगहरूलाई सरकारले दिन भनेको विद्युत महसुल रकमको छूट प्राधिकरणलाई अझै तिरेका छैनन् । दुई वर्षभन्दा बढीको १३ करोड ८७ लाख १६ हजार रुपैयाँ प्राधिकरणलाई कतिपय सरकारी संस्थाले दिन बाँकी रहेको पौडेलको  भनाइ छ ।  भरतपुरका सिँचाइ, सडक बत्तीको पनि बक्यौता उठ्न बाँकी छ । भरतपुर महानगरपालिकाले पनि सडक बत्तीको रकम नियमित तिरेको छैन । सडक बत्तीको मात्रै १२ करोड ६ हजार रुपैयाँ विद्युत महशुल तिर्न बाँकी रहेको प्राधिकरणको तथ्यांक छ । कालोसूचीमा परेका दुई सय ६७ जना ग्राहकबाट ७३ लाख रुपैयाँ उठ्न बाँकी छ ।  घरायसी बिजुलीको आठ करोड ६८ लाख १९ हजार, संस्थागत ७७ लाख १५ हजार, व्यवसायी  तीन करोड ११ लाख आठ हजार, सामाजिक संस्थाहरूको एक करोड १५ लाख १० हजार बक्यौता रहेको वितरण केन्द्रले जानकारी दिएको छ । मनोरञ्जन क्षेत्रको पाँच लाख ६९ हजार ६ सय ६७, औद्योगिक क्षेत्रको दुई करोड ९२ लाख ४१ हजार, खानेपानीको तीन लाख ४० हजार, अस्थायी, यातायात क्षेत्रको २० लाख, धार्मिक संघ संस्था र सामाजिक संघ संस्था, राजनीतिक संस्था लगायतले पनि तिर्न बाँकी रहेको उनले जानकारी दिए ।   उद्योग र व्यावसायिक प्रतिष्ठानले पनि तिरेनन् महसुल    जिल्लाका कतिपय उद्योग र व्यावसायिक प्रतिष्ठानले पनि नियमित रूपमा विद्युत महसुल तिरेका छैनन् । सबैभन्दा धेरै इको पोलोमरले नौ लाख ९९ हजार रुपैयाँ तिर्न बाँकी छ । यो रकम उद्योगको चार महीनाको बक्यौता हो । अनमोल फिड्सले ६ महीनादेखि विद्युत महसुल तिरेको छैन । फिड्सको आठ लाख ३० हजार रुपैयाँ तिर्न बाँकी छ ।  शक्ति प्लाष्टिक उद्योगले सात महीनाको ६ लाख १३ हजार, डेलिमा केटारले ६ महीनाको चार लाख ७९ हजार, लेक ट्वान्टी फार्मर एण्ड रिसोर्टले चार महीनाको चार लाख ५२ हजार, इनर्जि फुडले १२ महीनाको चार लाख २२ हजार, फोर सिजन रेष्टुरेण्टले पाँच महीनाको ३ लाख ७९ हजार, लाइम एण्ड लेमन क्याफेले चार महीनाको तीन लाख ५८ हजार रुपैयाँ नतिरेको पौडेलले बताए ।  बक्यौता रकम बढी हुन थालेपछि दुई महीनाभन्दा बढी समयदेखि विद्युत महसुुल नतिरेका ग्राहकहरूको लाइन काट्ने तयारी गरिएको छ । अभियान नै सञ्चालन गरेर दुई महीनादेखि विद्युत महसुल नतिरेका ग्राहकको आइतवारदेखि विद्युत लाइन काट्न लागेको केन्द्रका इन्जिनियर पौडेलले जानकारी दिए । ‘दुई महीनादेखि नतिर्ने ग्राहकको लाइन काट्दैछौं,’ उनले भने, ‘६ महीनाभन्दा बढी समय नतिर्नेलाई कालोसूचीमा राख्दैछौं ।’  हालसम्म केन्द्रले दुई सय ६७ ग्राहकलाई कालोसूचीमा राखेको छ, जसबाट ७३ लाख तीन हजार रुपैयाँ रकम उठ्न बाँकी छ । हालसम्म घरयासी बिजुलीका दुई सय १४ ग्राहक कालोसूचीमा परेको उनले जानकारी दिए । ३९ वटा उद्योग, ६ वटा संस्थागत, तीन वटा वाटर सप्लाईलाई कालोसूचीमा राखिएको छ ।