काठमाडौं । गत मङ्सिर १९ गते १ हजार ८३० विन्दुसम्म झरेको नेपालको धितोपत्र दोस्रो बजार मङ्सिर २० गतेदेखि उकालो लागेको छ ।
त्यसपछिको १३ कारोबार दिनमा नेप्से परिसूचक तीन कारोबार दिन मात्र घटेको छ । मङ्सिर २० गतेपछि मङ्सिर २५ गते १५ दशमलव ४० अंकले घटेको बजार पछिल्लो कारोबार दिन पुस ५ गते ३२ दशमलव ७७ अंक र पुस ८ गते २१ दशमलव शून्य ३ अंकले घटेको छ । पछिल्लो कारोबार दिन नेप्से परिसूचक २ हजार ८८ दशमलव शून्य ७ विन्दुमा पुगेको छ । यो बीचमा बजार २ हजार १५४ दशमलव ५१ विन्दुसम्म पुगेको छ ।
बढेको बजारमा उत्पादन तथा प्रशोधन समूहका कम्पनीको शेयर मूल्य औसतमा १८ दशमलव ७७ प्रतिशत बढेको छ । धितोपत्र दोस्रो बजारमा हाल यो समूहअन्तर्गत आठ कम्पनीहरूको शेयर सूचीकृत छ । बोटलर्स नेपाल (बालाजु), बोटलर्स नेपाल (तराई), नेपाल ल्यूब आयल, युनिलिभर नेपाल, शिवम् सिमेन्ट, घोराही सिमेन्ट इन्डण्ट्री, सोनापुर मिनरल्स एण्ड आयल र हिमालय डिष्टिलरीको शेयर उत्पादन तथा प्रशोधन समूहअन्तर्गत सूचीकृत भएको हो । यीमध्ये नेपाल ल्यूब आयलको भने शेयर कारोबार भएको देखिँदैन । नेपाल ल्यूब आयलको पछिल्लो कारोबार दिनको अन्तिम मूल्य २८२ रुपैयाँ ४० पैसा कायम छ ।
यो समूह अन्तर्गतका कम्पनीमध्ये शेयर मूल्यका हिसाबमा सबैभन्दा बढी युनिलिभर नेपालको छ । युनिलिभर नेपालको शेयर मूल्य प्रतिकित्ता ४३ हजार १०० रुपैयाँ कायम छ । मङ्सिर १९ गते युनिलिभर नेपालको शेयर मूल्य प्रतिकित्ता ३९ हजार रुपैयाँ थियो । यो बीचमा युनिलिभर नेपालको शेयर मूल्य प्रतिकित्ता ४ हजार १०० रूपैयाँले बढेको छ । युनिलिभर नेपालले यस वर्ष हालसम्मकै सर्वाधिक लाभांश वितरण गरिसकेको छ । कम्पनीले प्रतिकित्ता १ हजार ५८० रुपैयाँका दरले यस वर्ष नगद लाभांश वितरण गरेकोे हो ।
उत्पादन तथा प्रशोधन समूह अन्तर्गतका अधिकांश कम्पनीहरूले यो वर्ष लाभांश वितरण गर्न लागेका छन् । शिवम् सिमेन्टले १४ दशमलव २५ प्रतिशत बोनस शेयर र कर प्रयोजनका लागि शून्य दशमलव ७५ प्रतिशत नगद लाभांश, घोराही सिमेन्टले १५ प्रतिशत बोनस शेयर, हिमालयन डिष्टिलरीले १० प्रतिशत बोनस शेयर र कर प्रयोजन समेतका लागि १५ प्रतिशत नगद लाभांश, नेपाल ल्यूब आयलले २५ प्रतिशत बोनस शेयर र कर प्रयोजनका लागि ५ प्रतिशत नगद लाभांश, बोटलर्स नेपाल (तराई)ले ६० प्रतिशत नगद लाभांश वितरणको प्रस्ताव गरेको छ ।
बोटलर्स नेपाल (बालाजु)ले यस वर्ष लगानीकर्ताको हात खाली बनाएको छ भने असोजमा २४ गते सर्वसाधारणमा आईपीओ बाँडफाँट गरेको सोनापुर मिनरल्सले लाभांशसम्बन्धी कुनै पनि जानकारी सार्वजनिक गरेको छैन ।
यस वर्ष धेरै कम्पनीले लाभांश वितरण नगर्ने घोषणा गरेका छन् । उत्पादन तथा प्रशोधन समूहका अधिकांश कम्पनीले भने आकर्षक लाभांश घोषणा गरिसकेका छन् । बढेको बजारमा उत्पादन तथा प्रशोधन समूह अन्तर्गतका सबै कम्पनीको शेयर मूल्य बढेको छ । यसबीचमा नेपाल ल्यूब आयलको २५ प्रतिशत बोनस शेयरमा मूल्य समायोजन भएको छ ।
स्रोत : नेपाल स्टक एक्सचेञ्ज (नेप्से) ।
