काठमाडौं । काठमाडौंस्थित भारतीय राजदूतावासले पुस्तक विमोचन तथा छलफल कार्यक्रमको आयोजना गरेको छ । नेपाल–भारत पुस्तकालयमा ‘नेपाल–भारत साहित्य महोत्सव’अन्तर्गत उक्त कार्यक्रम आयोजना गरिएको हो ।
कार्यक्रममा सर्वोच्च अदालतका पूर्वन्यायाधीश गिरीशचन्द्र लालले बीपी कोइराला फाउण्डेशनको सहयोगमा प्रकाशित हिन्दी पुस्तक ‘नेपाल में हिंदी’ को विमोचन गरे ।
कार्यक्रममा नेपालका वरिष्ठ कविद्वय स्नेह सायमि र राजेन्द्र शलभको नेपालीबाट हिन्दीमा अनुदित कविता संग्रह ‘उजाले के रंग’ र स्नेह सायमिको नेपाली कविता संग्रह ‘चश्मा र आँखाको वार्ता’बारे चर्चा गरिएको थियो ।
सो कार्यक्रममा त्रिभुवन विश्वविद्यालयका हिन्दी प्राध्यापक डा. श्वेता दिप्ती, प्रतिष्ठित कवि विधान आचार्य र वरिष्ठ साहित्यकार डा. रामदयाल राकेशले आ–आफ्नो विचार राखे ।
सम्बोधनका क्रममा प्रमुख अतिथि गिरीशचन्द्र लालले नेपाल र भारतबीचको सदियौं पुरानो सम्बन्धमा साझा संस्कृति तथा दुवै देशको भाषाको महत्त्वबारे प्रकाश पारे । कार्यक्रममा लेखक, शिक्षक, भाषाविद् तथा साहित्यप्रेमीको उपस्थिति थियो ।