काठमाडौं। चालू आर्थिक वर्षमा नेपालको आर्थिक वृद्धि ३ दशमलव १ प्रतिशत रहने अन्तरराष्ट्रिय मुद्राकोष (आईएमएफ) ले प्रक्षेपण गरेको छ । आईएमएफ मिशन चिफ टिडिएन किन्डाले सोमवार काठमाडौंमा पत्रकार सम्मेलन गरी उक्त जानकारी दिए । आर्थिक वृद्धि बढाउन सरकारले पूँजीगत खर्चको गुणस्तरमा सुधार गर्दै त्यसमा खर्च बढाउनुपर्ने उनको भनाइ छ ।
‘सरकारले राजस्व बढाएर र सस्तो ब्याजदरमा सहुलियतपूर्ण कर्जा लिएर पूँजीगत खर्च बढाउनुपर्छ,’ किन्डाले भने, ‘पूँजीगत खर्च बढाउने लामो प्रक्रिया हुन्छ । त्यसमा अहिलेको सरकारले सकारात्मक प्रयास गरिरहेको छ ।’ सरकारले आगामी वैशाखमा आयोजना गर्न लागेको लगानी सम्मेलनलाई संरचनात्मक सुधारको अवसरका रूपमा प्रयोग गर्दै आर्थिक वृद्धिको बाटो खोल्नुपर्ने टिन्डाले बताए । पर्यटन क्षेत्रमा भएको सुधार, विप्रेषण आप्रवाहमा भएको वृद्धि र लचिलो मौद्रिक नीति बनाउँदासमेत बैंक, वित्तीय संस्थाको कर्जा लगानी बढ्न नसकेको किन्डाले बताए ।
‘कुल गार्हस्थ्य उत्पादनको तुलनामा नेपालको कर्जा विस्तार उच्च थियो । बैंकहरूको निष्क्रिय कर्जा बढेको छ । तर पनि नेपाल राष्ट्र बैंकले चालू पूँजी कर्जासम्बन्धी मापदण्ड कार्यान्वयनमा ल्याएपछि चालू पूँजी प्रकृतिको कर्जा घट्नु र टर्म कर्जा बढ्नु सकारात्मक छ,’ किन्डाले भने, ‘अहिले राष्ट्र बैंकले ऋणीलाई दिएको सुविधालाई हामीले ट्रान्जिशनको रूपमा हेरेका छौं । आगामी दिनमा राष्ट्र बैंकले सम्पत्ति वर्गीकरण मापदण्ड र चालू पूँजी कर्जासम्बन्धी मापदण्ड पूर्णरूपमा कार्यान्वयन गर्नुपर्छ ।
आईएमएफले सरकारले कर प्रणालीमा सुधार गरेर राजस्व बढाउनुपर्ने र राष्ट्र बैंकले तथ्यांकमा आधारित मौद्रिक नीति बनाउनुपर्नेमा जोड दिएको छ । उसले सहकारीलाई नियमनको दायरामा ल्याउन पनि सुझाव दिएको छ । अहिले आईएमएफको कर्मचारी तहको टोली औपचारिक मूल्यांकन गर्नुभन्दा पनि सरकारले कसरी काम गरिरहेको छ भन्ने हेर्न आएको किन्डाको भनाइ छ । अहिलेको भ्रमणमा आईएमएफले नेपालको माइक्रोइकोनोमीको विषयमा छलफल गरेको र ईसीएफका शर्तहरूको प्रगति विश्लेषण गरेको उनले बताए ।
