जेठ २२, काठमाडौं । नेपाल पूँजीबजार लगानीकर्ता संघले प्रधानमन्त्री शेर बहादुर देउवा समक्ष चार बुँदे माग सहितको ज्ञापन पत्र बुझाएका छन् । आइतवार संघकी अध्यक्ष राधा पोखरेल सहितको पदाधिकारीहरुको टोलीले प्रधानमन्त्री देउवा समक्ष ज्ञापन पत्र बुझाएका हुन् ।
ज्ञापनपत्रमा शेयर धितो कर्जामा लगाइएको ४/१२ को नीति खारेज गरिनु पर्ने, सिडी रेसियोलाई खारेज गरेर पुनः सिसिडि मै फर्कनु पर्ने, जोखिम भार १५० प्रतिशत कायम गरिएकोमा पुरानै व्यवस्था कायम गरिनु पर्ने, र बैंकलाई ब्रोकर लाईसेन्स दिनु पर्ने विषय उल्लेख छ ।
ज्ञापन पत्र बुझाउँदै प्रधानमन्त्री समक्ष संघकी अध्यक्ष पोखरेलले पूँजीबजारको पछिल्लो अवस्था र समस्याको बारेमा जानकारी गराएकी थिइन् । राष्ट्र बैंकको पछिल्लो नीतिका कारण ऐतिहासिक रेकर्ड कायम गरेको बजार निरन्तर घटिरहेकाले यसको निकासका लागि पहल गर्न अध्यक्ष पोखरेलले प्रधानमन्त्री देउवा समक्ष आग्रह गरेकी थिइन् ।
प्रधानमन्त्री देउवाले आफूहरुकै अघि राष्ट्र बैंकका गभर्नर महाप्रसाद अधिकारीलाई फोन गरी पूँजीबजारको समस्या तत्काल समाधान गर्न निर्देशन दिएको पोखरेलको भनाइ छ ।
संघले सोमवार राष्ट्र बैंकमा पूँजीबजारको समस्या र समाधानका विषयमा छलफल कार्यक्रम तय गरिसकेको जानकारी समेत अध्यक्ष पोखरेलले गराएकी छिन् ।
