स्वास्थ्य क्षेत्रमा देखापर्ने समस्यामध्ये महिलामा हुने पिसाब सङ्क्रमण एउटा ठूलो समस्या हो । नेपाली महिलामा यो रोग कति छ, त्यसको आँकडा नभए पनि प्रायः धेरै परिवारले यो पीडाको असर अनुभव गरेको हुन सक्छ ।
महिलामा पिसाब सङ्क्रमणको मुख्य कारण प्रतिरक्षा शक्ति कम भएको शरीरमा रोग उत्पन्न गर्न सक्ने क्षमता भएका कीटाणुको सजिलो प्रवेश नै हो । महिलाको शरीरिक बनोट र क्रियाको विशेषताले गर्दा मुत्रथैलीमा कीटाणु प्रवेश गर्न सजिलो हुन्छ । एकपटक प्रवेश गरेपछि कीटाणु भुवाको सहयोगले चाम्रो तरिकाले टाँसिएर एउटा तह नै बनाएर बस्छ । महिलाको मोटो आन्द्रा, योनि र पिसाब थैलीको कोषभित्र कीटाणु सञ्चित भएर रहने हुँदा बारम्बार पिसाब सङ्क्रमण हुने गर्छ । महिलामा मुत्र सङ्क्रमण सामान्य अवस्थादेखि ज्यादै जटिल रोगका रूपमा देखिन सक्छ ।
