कोरोना भाइरसको संक्रमण रोक्न मध्यपुरथिमि नगरपालिकाले तीन करोड रुपैयाँको नगर विपद् कोष स्थापना गरेको छ । नगर कार्यपालिकाको आकस्मिक बैठकले तीन करोडको उक्त कोष स्थापना गरेको नगरप्रमुख मदनसुन्दर श्रेष्ठले जानकारी दिए ।
नगरपालिकाले आफ्ना नौवटै वडामा वडाध्यक्षको संयोजकत्वमा पाँच–पाँच लाखको वडा विपद् कोषसमेत निर्माण गरेको छ । नगरपालिकाले वडामार्फत खाद्यान्न आपूर्ति, राहत व्यवस्थापन तथा वितरण कमिटी गठन गरेर कोरोनालगायतका विपद्बाट पीडितलाई राहत वितरण गरिने उहाँले जानकारी दिनुभयो । नगरप्रमुख श्रेष्ठका अनुसार नगर क्षेत्रभित्र एकद्वार प्रणालीमार्फत राहतका कार्यक्रम सञ्चालन गर्ने छ ।